նախընտրելի դարձնելԵրեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի առջեւ այսօր` մայիսի 30-ին ժամը 12:00-ին տեղի է ունեցել բողոքի ակցիա` նվիրված Տիգրան Փոստանջյանի դեմ դատավարությանը:
Հիշեցնենք, որ այսօր արդեն 20-րդ օրն է, ինչ «Ժառանգության» պատգամավոր Զարուհի Փոստանջյանի եղբայրը` Տիգրանը հացադուլի մեջ է, որով նա իր բողոքն է հայտնում «Նուբարաշեն» ՔԿՀ-ում տիրող նվաստացուցիչ պայմաններից եւ իր դեմ կիրառվող ապօրինի կալանքից:
Ակցիային մասնակցել են բազմաթիվ քաղաքացիներ, «Ժառանգություն» կուսակցության վարչության անդամները, պատգամավորները, ովքեր պահանջում էին անհապաղ դադարեցնել անօրինական քրեական հետապնդումը եւ ազատ արձակել քաղաքական պատանդ Տիգրան Փոստանջյանին: Ակցիան ուղեկցվել է հետեւյալ կարգախոսներով.
Մեր սերնդի կարգախոսն է` ազատություն, արդարություն, արժանապատվություն
Հեղափոխությունից սարսափողներ, ազատության հաղթարշավը անկասելի է
Մենք բոլորս Տիգրան ենք
37 թիվը չի կրկնվի
Ո’չ ստալինյան օրենքներին
Չե’ք վախեցնի
Հայտարարություն` վարձով է տրվում ազատ բանտախուց: Պատվերների համար դիմել նախագահական: Գինը` պայմանագրային
Ներքին օգտագործման դատարան
Փնտրվում է Տիգրան Փոստանջյանին մեղադրող հոդվածը
Արթուր Մկրտչյան, ձեզ վեր մի’ դասեք օրենքից
Հարկերը` մեզնից, գործ սարքելը` ձեզնից
Համաներումից հետո թափուր բանտախցեր` նոր անմեղների համար
Հաշվեհարդար հայկական տարբերակով:
Ավելի վաղ NEWS.am-ը հայտնել է, որ ՀՀ գլխավոր դատախազությունում քրեական գործ է հարուցվել Տիգրան Փոստանջյանի նկատմամբ՝ ապօրինի վարձատրություն ստանալու համար, ապա նա կալանավորվել է: Տ. Փոստանջյանը հայտարարել է, որ այդ գործի մասին տեղեկացել է դատախազության կայքից եւ որ դա ամբողջովին սադրանք է եւ ուղղված է իր քրոջ գործունեությունը զսպելուն:
