Facebook-ը եւ Instagram-ն երկարաձգել են նախագահ Դոնալդ Թրամփի հաշիվների արգելափակումն անորոշ ժամանակով կամ գոնե առաջիկա երկու շաբաթվա ընթացքում` «մինչեւ իշխանության խաղաղ փոխանցման ավարտը»: Այս մասին հայտարարել է սոցիալական ցանցի գործադիր տնօրեն Մարկ Ցուկերբերգը:

«Անցած 24 ժամերի ցնցող իրադարձությունները հստակ ցույց են տալիս, որ նախագահ Դոնալդ Թրամփը մտադիր է օգտագործել իշխանության մնացած ժամանակը` իր ընտրված իրավահաջորդ Ջո Բայդենին իշխանության խաղաղ եւ օրինական փոխանցումը խափանելու համար:

Կապիտոլիումի շենքի մոտ իր կողմնակիցների գործողությունները արդարացնելու, այլ ոչ թե դատապարտելու համար իր պլատֆորմն օգտագործելու նրա որոշումը արդարացիորեն մտահոգել է մարդկանց Միացյալ Նահանգներում եւ ամբողջ աշխարհում: Երեկ մենք ջնջեցինք այս հայտարարությունները, քանի որ կարծում էինք, որ դրանց ազդեցությունը եւ, հավանաբար, դրանց նպատակադրումը, հետագա բռնությունների կհանգեցնի:

Կոնգրեսի կողմից ընտրությունների արդյունքների հաստատումից հետո ամբողջ երկրի համար այժմ առաջնահերթություն պետք է լինի ապահովելը, որպեսզի երդմնակալության ավարտից հետո մնացած 13 օրը խաղաղ անցնեն եւ համապատասխանեն հաստատված ժողովրդավարական նորմերին:
Վերջին մի քանի տարվա ընթացքում մենք նախագահ Թրամփին թույլ ենք տվել օգտագործել մեր պլատֆորմը` մեր սեփական կանոնների համաձայն, երբեմն հեռացնելով կամ նշելով քոնթենթը, երբ դրանք խախտում էին մեր քաղաքականությունը: Մենք դա արել ենք, քանի որ հավատում ենք, որ հասարակությունն իրավունք ունի հնարավորինս լայն հասանելիություն ունենալ քաղաքական ելույթներին, նույնիսկ` վիճահարույց: Սակայն ներկայիս համատեքստն էապես այլ է` կապված ժողովրդավարական ճանապարհով ընտրված կառավարության դեմ բռնի ապստամբություն հրահրելու նպատակով մեր պլատֆորմի օգտագործման հետ: Մենք կարծում ենք, որ ռիսկերը, որոնք թույլ են տալիս նախագահին այս ժամանակահատվածում  շարունակել օգտագործել մեր ծառայությունը, պարզապես չափազանց մեծ են: Ուստի մենք անորոշ ժամանակով երկարաձգում ենք նրա հաշիվների արգելափակումը Facebook-ում եւ Instagram-ում եւ, առնվազն` հաջորդ երկու շաբաթվա ընթացքում` մինչեւ իշխանության խաղաղ փոխանցման ավարտը»: