Նախընտրելի
Կառավարությունն առաջարկներ է ներկայացրել օրինագծում, որով նախատեսվում է պայմանագրային զինծառայության անցնելու տարիքային շեմի բարձրացում մինչեւ 63 տարեկան: Այս մասին ապրիլի 9-ին Ազգային ժողովում Պաշտպանության եւ անվտանգության հարցերի խորհրդարանական մշտական հանձնաժողովի նիստում «Զինծառայության եւ զինծառայողի կարգավիճակի մասին» օրենքում փոփոխություններ կատարելու մասին օրինագծի քննարկման ժամանակ ասաց «Լուսավոր Հայաստան» կուսակցության խմբակցության քարտուղար Գեւորգ Գորգիսյանը:
Կառավարությունը, մասնավորապես, Զինված ուժերի տարբեր կոչումների եւ սպաների համար տարիքային տարբեր սահմանափակումներ է առաջարկել:
Պատգամավորի խոսքով՝ գործող օրենսդրության համաձայն՝ պայմանագրային զինծառայությունը սահմանափակված է: Մի դեպքում սահմանափակումները կազմում են մինչեւ 45 տարեկան, մեկ այլ դեպքում՝ մինչեւ 40: «Լուսավոր Հայաստանն» առաջարկում է այդ շեմը բարձրացնել մինչեւ 63 տարեկան:
«Առաջին եւ երկրորդ ընթերցմամբ քննարկման ժամանակ Կառավարությունն առաջարկեց տարբեր կոչումների համար սահմանել տարբեր տարիքային շեմեր»,- ասաց Գորգիսյանը՝ հավելելով, որ այդ առաջարկը «Լուսավոր Հայաստանի» համար ընդունելի է, քանի որ տարիքի մեծացման միտումը պահպանվում է:
Այսպիսով՝ Զինված ուժերում եւ այլ զորքերումմ կարող են ծառայել արական սեռի քաղաքացիներ, որոնք նախկինում պայմանագրային զինծառայություն չեն անցել եւ մինչեւ 40 տարեկանը հաշվառված են պահեստազորում: «Լուսավոր Հայաստանն» առաջարկել էր այս տարիքային շեմը բարձրացնել մինչեւ 63 տարեկան, իսկ Կառավարությունը՝ մինչեւ 45:
Արդյունքում՝ պայմանագրային զինծառայություն անցնելու տարիքային շեմը 45-ից բարձրացվեց մինչեւ 50 տարեկան կրտսեր եւ ավագ ենթասպաների, 48-ից մինչեւ 52 տարեկան կրտսեր սպաների, 50-ից մինչեւ 55 տարեկան մայորների եւ փոխգնդապետների համար, իսկ գնդապետների համար՝ 55-ից մինչեւ 58 տարեկան: Միաժամանակ ավելի բարձր կոչումների համար տարիքային շեմը մնաց անփոփոխ:
Կառավարությունը տարիքային սահմանափակումների առումով առաջարկել էր նաեւ այլ փոփոխություններ:
Արդյունքում՝ որոշ քննարկումներից հետո օրինագիծը ստացավ հանձնաժողովի դրական եզրակացությունը:
