նախընտրելի դարձնել«Ճանաչիր քո երկիրը» երիտասարդական նախաձեռնությունը հայտարարություն է տարածել, որում նշում է, որ «ազատագրված տարածքների հարցում ցանկացած զիջում հանգեցնելու է հայ ժողովրդի աննախադեպ բունտի»:
Հայտարարության մեջ, մասնավորապես, ասվում է. «Վերամիավորված տարածքների ցանկացած սակարկում համահայկական խռովության այնպիսի մի ալիք է բարձրացնելու, որի հետեւանքներն անկանխատեսելի են լինելու: Վերամիավորված պապենական հողերի զիջումն Ադրբեջանին այն եզակի հարցերից է, որն ի զորու է ոտքի հանել համայն աշխարհի հայությանը:
Մեր օրերում ընդունված է խոսել այն մասին, որ երիտասարդության մի ստվար շերտ զրկված է ազգային մտածողությունից: Որքան էլ պարադոկսալ է, բայց «Ճանաչիր քո երկիրը»-ի անցկացրած ուսումնասիրությունը ցույց է տվել, որ այս խավի ներկայացուցիչները ազատագրված տարածքների ամենափոքր զիջման դեպքում առաջինն են ոտքի ելնելու: Ազատագրված Արցախն ու դրա հարակից շրջանները այդպիսի երիտասարդների ենթագիտակցության մեջ արմատավորված են «իրենց հայրերի արյունով ազատված հայկական հողեր» կարծրատիպում, ուստի, զարմանալի է, բայց երիտասարդության հենց ա՛յդ շերտն է լինելու համազգային խռովության առաջին դիրքերում:
Տարածքների փաստացի զիջման վերաբերյալ որեւէ փաստաթղթի տակ ստորագրած անձը հասարակության կողմից մեխանիկորեն սկսելու է ընկալվել ոչ թե որպես ազգի դավաճան, այլ իբրեւ ազգի թշնամի` դրանից բխող բոլոր հետեւանքներով: Առանձին դեպքերում հնարավոր են նաեւ ազգի թշնամիների նկատմամբ միջնադարում ընդունված որոշ ավանդույթների վերածննդի փորձեր:
Հայկական ազատագրված տարածքների զիջումը հանգեցնելու է ողջ զինվորականության բունտին: Չնայած հայկական բանակում երբեմն հանդիպող անառողջ մթնոլորտի դրսեւորումներին, անհնար է ժխտել, որ Արցախն ու ազատագրված տարածքները զինվորականության կողմից ընկալվում են որպես սրբություն: Անգամ եթե հաջողվի «համոզել» բարձրագույն սպայակազմին «համաձայնվել Արցախի կարգավիճակի դիմաց զիջել որոշ տարածքներ», նրանց ենթակաների մեծ մասը պարզապես կհրաժարվի կատարել «ազգադավ վերադասի» հրամանները:
«Ճանաչիր քո երկիրը» նախաձեռնության անդամները հաճախ հայրենաճանաչողական արշավների են մեկնում ազատագրված տարածքներ:
Այնտեղ ազգի դավաճանի պիտակ ձեռք բերելու համար բավական է արցախցիների հետ զրույցում միայն բացել իրենց հայրենիքի «փոխզիջման» մասին խոսակցությունը: Նախաձեռնության անդամ երիտասարդները շփվել են ազատագրված տարածքների հարյուրավոր բնակիչների հետ:
Նրանց մեջ չկա գեթ մեկը, որը ղեկավարվեր «ամեն ինչի պատրաստ ենք, միայն թե պատերազմ չլինի» սկզբունքով: Արցախցիները պատրա՛ստ են տեր կանգնել իրենց հայրենիքին: XX դարավերջի պատմությունը նրանց մի անբացատրելի, գերբնական ուժով է կապել սեփական հողի հետ: Ցանկացած արցախցի պատրաստ է ջնջել երկրի երեսից յուրաքանչյուրին, ով կփորձի «զիջել» (տեղական տերմինաբանությամբ` ծախել) իր կամ իր հայրերի արյունով ազատագրված հողերը:
Վաղը` կազանյան հանդիպմանը զուգահեռ, «Ճանաչիր քո երկիրը» նախաձեռնության անդամ 50 երեւանցի երիտասարդ արշավի է մեկնելու հայկական ազատագրված տարածներ` Քաշաթաղի եւ Շահումյանի շրջաններ: Նրանք քաղցր հյուրասիրություն են տանելու արցախցիներին»:
