նախընտրելի դարձնելՄոսկվայի Համառուսաստանյան ցուցահանդեսային կենտրոնում «ԱՊՀ 20- ամյակ. համագործակցության նոր հորիզոններ» խորագրով միջպետական ցուցահանդեսի շրջանակում այսօր` հուլիսի 1-ին նշվել է Հայաստանի օրը:
Հունիսի 28-ից հուլիսի 3-ն անցկացվող ցուցահանդեսի ընթացքում ԱՊՀ երկրները հանդիսավորապես նշում են իրենց ազգային օրը, որն ուղեկցվում է մշակութային միջոցառումներով: Ցուցահանդեսին մասնակցում եւ իրենց արտադրանքն են ներկայացնում հիմնականում սննդի արտադրության, շինարարական, մեքենաշինական ոլորտի մեկուկես տասնյակից ավելի հայկական ընկերություններ: Միջոցառման շրջանակում տեղի կունենա նաեւ նորարարական համաժողով, որի ընթացքում Զարգացման հայկական գործակալությունը կներկայացնի մի շարք ներդրումային ծրագրեր:
Ցուցահանդեսի նպատակը ԱՊՀ երկրների միջեւ կառուցողական փոխգործակցության եւ ռազմավարական գործընկերության զարգացումն է, ձեռք բերված արդյունքների ներկայացումը:
Համառուսաստանյան ցուցահանդեսային կենտրոնում մշտապես գործում է «Արմենիա» առեւտրացուցահանդեսային տաղավարը, որտեղ ներկայացվում է երկրի արդյունաբերական ներուժը, Հայաստանի հարուստ պատմական ժառանգությունը:
Փոխվարչապետի այցի ընթացքում Հայաստանի Հանրապետության եւ Ռուսաստանի Դաշնության կառավարությունների միջեւ ստորագրվեց համաձայնագիր` Համառուսաստանյան ցուցահանդեսային կենտրոնում ՀՀ «Արմենիա» առեւտրացուցահանդեսային կենտրոնի տարածքի վարձակալության վերաբերյալ: Նշենք, որ միջոցառմանը մասնակցել են Հայաստանի փոխվարչապետ, ԱՊՀ տնտեսական խորհրդի անդամ Արմեն Գեւորգյանը, ՌԴ-ում ՀՀ դեսպան Օլեգ Եսայանը, պաշտոնատար այլ անձինք, հայ համայնքի ներկայացուցիչներ:
