Շրի Լանկայի նախագահ Գոտաբայ Ռաջապակսան կարգադրել է հետաքննություն անցկացնել այն մեղադրանքների վերաբերյալ, ըստ որոնց պետական ​​հետախուզության որոշ պաշտոնյաներ ճանաչել եւ հանդիպել են այն մարդկանց, որոնց գործած ահաբեկչական գործողության ժամանակ 2019 թվականին զոհվել էր ավելի քան 260 մարդ, հայտնել է AP-ն:

Շրի Լանկայի կաթոլիկ եկեղեցին նամակ է գրել նախագահին՝ մտահոգություն հայտնելով այն բանի հետ կապված, թե կառավարությունն ինչպես է կանխում մահապարտ ահաբեկիչների պայթունները եւ խնդրելով հետաքննել հետախուզության աշխատակիցների եւ հարձակումներն իրականացրած խմբի միջեւ ենթադրյալ կապերը:

Երկու մահմեդական խմբեր, որոնք իրենց հավատարմությունն են հայտնել «Իսլամական պետությանը», վեց համաձայնեցված հարձակում են իրականացրել եկեղեցիների եւ հյուրանոցների վրա, որոնց զոհ է դարձել 269 մարդ:

Հանուն արդարության ազգային կաթոլիկ կոմիտեի նամակում մի խումբ եպիսկոպոսներ եւ քահանաներ, Կոլոմբոյի արքեպիսկոպոս կարդինալ Մալքոլմ Ռանջիթի գլխավորությամբ, դատական ​​հետապնդում են պահանջում նախկին նախագահ Մաիտրիպալա Սիրիսենայի նկատմամբ՝ վերջինիս անփութության հետ կապված:

Սիրիսենայի կառավարությունը խիստ քննադատության է ենթարկվել այն բանի համար, որ չի արձագանքել արտաքին հետախուզության կողմից ստացված գրեթե հստակ նախազգուշացումներին առ այն, որ հարձակումն անխուսափելի է: