նախընտրելի դարձնելՄայիսի 16-ին, ժամը 12.45-ին, ոստիկանության Երեւան քաղաքի վարչության հերթապահ մասից Կենտրոնականի բաժնում հաղորդում է ստացվել, որ իրենց է ահազանգել անհայտ անձը եւ հայտնել, որ Թումանյան-Մաշտոց փողոցների խաչմերուկում գործող «Սթար» սուպերմարկետում ռումբ է տեղադրված, որը մեկ ժամվա ընթացքում պայթելու է:
Ժամը 13.45-ին, նույն անձը կրկին ահազանգել է, որ Մաշտոցի պողոտայի 37 շենքի դիմաց` ավելապահոցի մեջ, միջուկային զենք է դրված:
Նույն ժամանակահատվածում եւս մեկ ահազանգ է ստացվել, որ ոստիկանության Մալաթիայի բաժնի մոտ 18 214 պետհամարանիշի ավտոմեքենայի մեջ միջուկային զենք է տեղադրված:
Հայաստանի ոստիկանության մամուլի ծառայությունից NEWS.am-ին հայտնում են, որ ձեռնարկված միջոցառումներով պարզվել է, որ ահազանգերը կատարվել են Թումանյան-Մաշտոց փողոցների խաչմերուկում եւ Մաշտոց 37 հասցեի դիմաց տեղակայված քարտֆոն հեռախոսներից: Ոստիկանության Կենտրոնականի, Մաշտոցի եւ Մալաթիայի բաժինների ծառայողների ձեռնարկած օպերատիվ-հետախուզական միջոցառումների արդյունքում` մայիսի 17-ին, ժամը 10.05-ին, ահաբեկչության մասին կեղծ ահազանգեր տալու համար ոստիկանության Կենտրոնականի բաժին բերման է ենթարկվել 1987 թ. ծնված Էդգար Վ.-ն:
Նախապատրաստված նյութերն ուղարկվել են ոստիկանության Կենտրոնի քննչական բաժին` նախաքննություն կատարելու:
