նախընտրելի դարձնել
Սեպտեմբերից Եվրոպայում գործազուրկ քաղաքացիների թիվը կավելանա՝ համավարակի ժամանակ ներդրված աշխատանքի պահպանման ծրագրի շնորհիվ: The Economist Intelligence Unit-ի (EIU) վերլուծաբանները կանխատեսում էին, որ գործազրկության միջին մակարդակը Ֆրանսիայում, Իտալիայում, Իսպանիայում եւ Մեծ Բրիտանիայում 2020 թվականի 9.2 տոկոսից 2021 թվականին կաճի մինչեւ 10.1 տոկոս, հաղորդում է «Լենտա»-ն:
2020 թվականին՝ համավարակի գագաթնակետին, եվրոպական երկրներն աշխատողներին ժամանակավոր արձակուրդ ուղարկեցին՝ աշխատատեղերը պահպանելու համար: Կառավարության ծրագրերը Ֆրանսիայում, Գերմանիայում, Իտալիայում, Իսպանիայում եւ Մեծ Բրիտանիայում ընդգրկում էին աշխատուժի մոտ մեկ երրորդը: Սակայն համավարակն արագացրեց ոլորտների ավտոմատացումը եւ փոխեց սպառման կառուցվածքը: Այն ընկերությունները, որոնց աշխատանքն ավելի արդյունավետ էր դարձել լոքդաունների ժամանակ, կարող են դժկամությամբ անձնակազմին վերադարձնել աշխատանքի: Վերլուծաբանները հարցում են անցկացրել պետական ծրագրին մասնակցած բրիտանացի գործարարների շրջանում: Դրանց գրեթե 20 տոկոսը հայտարարել է, որ կրճատում է անձնակազմը, եւս 20 տոկոսը պատրաստ է աշխատակիցներին առաջարկել միայն կես դրույքով աշխատանք:
Արտադրության ծավալը վերադարձել է նախահամաճարակային մակարդակին, բայց մեծ թվով աշխատողներ դեռ արձակուրդում են: Հետազոտողները ենթադրում են, որ այս աշխատակիցներից ոմանք աշխատանքից կազատվեն ծրագրի ավարտից՝ սեպտեմբերի 30-ից հետո:
Մեծ Բրիտանիան արդեն բախվել է զանգվածային գործազրկության: Ընդ որում, Միացյալ Թագավորության աշխատաշուկայում պարադոքս է առաջացել. չնայած գործազուրկ քաղաքացիների թվի աճին՝ թափուր աշխատատեղերի թիվը հասել է ռեկորդային մակարդակի: Երկրի անձնակազմի դեֆիցիտը 14 անգամ գերազանցում է նորմալ մակարդակը, իսկ աշխատավարձերը կայուն աճում են:
