նախընտրելի դարձնել
Թուրքական արժույթի փոխարժեքը նվազել մինչեւ 15 լիրա մեկ դոլարի դիմաց այն բանից հետո, երբ ապրիլին ինֆլյացիան աճել է մինչեւ 69,97 տոկոս՝ հասնելով վերջին երկու տասնամյակի ամենաբարձր մակարդակին, գրում է Ahval-ը։
Լիրան ընկել է մինչեւ 15,0421 մեկ դոլարի դիմաց։ Ժամը 14:31-ի դրությամբ այն 0,5 տոկոսով ցածր է եղել՝ մեկ դոլարի դիմաց 15,0312:
Մարտի կեսերից թուրքական արժույթը վաճառվել է 14,5-14,9 միջակայքում մեկ դոլարի դիմաց, ինչին նպաստել են Կենտրոնական բանկի եւ պետական բանկերի շուկայական միջամտությունները: Ֆինանսական կառույցները դեկտեմբերից տասնյակ միլիարդավոր դոլարներ են վաճառել, երբ արժութային ճգնաժամը հասել է իր գագաթնակետին եւ սպառնացել խաթարել տնտեսական կայունությունը։
«Կարծում եմ՝ մենք կրկին ուժեղ միջամտություն ենք տեսնում՝ 15-րդ մակարդակը պաշտպանելու համար, հիմարություն՝ հաշվի առնելով դոլարի ավելի լայն հզորությունը: Պաշարների վատնում, որը Թուրքիան չունի»,- ասել է Լոնդոնի BlueBay Asset Management-ի զարգացող շուկաների ավագ ռազմավար Թիմ Էշը:
2021 թվականին լիրան կորցրել է իր արժեքի 44 տոկոսը, ինչը օգնել է ինֆլյացիան հասցնել իր ամենաարագ տեմպերին 2000-ականների սկզբին բանկային ճգնաժամից ի վեր: Կորուստներն այս տարի կազմում են ավելի քան 10 տոկոս։ Դոլարը թանկանում է աշխարհի բազմաթիվ արժույթների նկատմամբ՝ պայմանավորված ինֆլյացիան զսպելու Դաշնային պահուստային համակարգի խստացված քաղաքականությամբ եւ Ուկրաինայի պատերազմի հետ կապված մտավախություններով։
Թուրքիայում ինֆլյացիան, որն ամենաբարձրն է G20-ի արդյունաբերական զարգացած երկրներում եւ հիմնական զարգացող շուկաներում, հավանաբար, մինչեւ դեկտեմբեր կպահպանվի 65-75 տոկոսի սահմաններում, քանի որ կենտրոնական բանկը չի բարձրացնի տոկոսադրույքները, ասել է JPMorgan Chase & Co-ն:
Թուրքիայի նախագահ Ռեջեփ Թայիփ Էրդողանը, որը երեք տարվա ընթացքում պաշտոնանկ է արել կենտրոնական բանկի երեք կառավարիչների, անցյալ տարվա վերջին դրամավարկային քաղաքականություն մշակողներին հրամայել է նվազեցնել տոկոսադրույքները՝ չնայած գնաճի արագացմանը: Բանկը 2022 թվականին անփոփոխ է թողել տոկոսադրույքները՝ չնայած գնային ճնշմանը եւ այն բանին, որ աշխարհի շատ այլ կենտրոնական բանկեր բարձրացնում են փոխառությունների արժեքը:
Տնտեսագետներն ու ռազմավարություն մշակողները զգուշացրել են, որ թուրքական իշխանությունները թողնում են, որ տնտեսությունը եւ լիրան ենթարկվեն համաշխարհային ինֆլյացիայի աճին, քանի որ Դաշնային պահուստային համակարգն ու Եվրոպական կենտրոնական բանկը (ԵԿԲ) խստացնում են քաղաքականությունը:
Տարեկան ինֆլյացիան հանելուց հետո Թուրքիան աշխարհում ամենացածր տոկոսադրույքն ունի։ Ճգնաժամից տուժած Արգենտինայում, որն իրականացնում է ԱՄՀ-ի շտապ վարկային ծրագիր, ինֆլյացիան կազմում է 55,1 տոկոս։ Կենտրոնական բանկը տոկոսադրույքները բարձրացրել է մինչեւ 47 տոկոս՝ նախորդ ամսվա 44,5 տոկոսից:
Թուրքերի գրեթե երեք քառորդը չի հավատում, որ ինֆլյացիայի պաշտոնական տվյալները ճիշտ են, հանգստյան օրերին հայտնել է Անկարայում գործող Metropoll հետազոտական ընկերությունը՝ վկայակոչելով ապրիլին իր անցկացրած ամենամսյա հարցումը: Սա դժվարացնում է տեղական բնակչության վստահության վերականգնումը կառավարության նկատմամբ այն բանից հետո, երբ թուրքերն անցյալ տարի զանգվածաբար դոլար ու եվրո էին գնում:
