Հուլիսի 11-ին արտակարգ իրավիճակ է ստեղծվել Կոտայքի մարզում: Ժամը 19:30-ի սահմաններում ուժեղ քամու հետևանքով Աբովյան–Նոր Հաճն ավտոճանապարհի Երևանյան խճուղում հսկայական 2 բարդի արմատից պոկվել և ընկել են էլեկտրական լարերի վրա։ Ըստ նախնական տեղեկությունների՝ բարեբախտաբար, տուժածներ չկան, հայտնում է shamshyan.com-ը։

Օպերատիվորեն ժամանել են Աբովյան խոշորացված համայնքի ղեկավար Էդուարդ Բաբայանն ու համայնքի ղեկավարի տեղակալ Արթուր Մովսիսյանը:

Ելնելով քաղաքացիների անվտանգությունից՝  ճանապարհային ոստիկանության  2-րդ սպայական գումարտակի 3-րդ վաշտի հրամանատար Արթուր Պետրոսյանի հանձնարարականով  երթևեկությունը ժամանակավորապես դադարեցվել է։

Արտակարգ իրավիճակների նախարարության փրկարար ծառայության հատուկ նշանակության փրկարարական աշխատանքների իրականացման կենտրոնի փրկարարները և Աբովյանի քաղաքապետարանի կոմունալ բաժնի ծառայողները էլեկտրական սղոցներով մասնատել են ծառը, որպեսզի այն հեռացնեն անվտանգ վայր: