ՀՀ հակակոռուպցիոն կոմիտեում ՀՀ կադաստրի կոմիտեի հետ համագործակցված աշխատանքի արդյունքում նախաձեռնված քրեական վարույթի շրջանակում ձեռք են բերվել հանցանքի կատարումը վկայող փաստեր այն մասին, որ ՀՀ կադաստրի կոմիտեի նախկին պաշտոնյան` Գ. Մ.-ն, մի շարք անձանց օժանդակությամբ, ինչպես նաեւ պաշտոնատար անձանց կողմից ծառայողական լիազորությունները չարաշահելու եւ պաշտոնեական կեղծիքներ կատարելու հետեւանքով խարդախությամբ հափշտակել է ընդհանուր շուրջ 4,5 մլրդ ՀՀ դրամ շուկայական արժեքով 7 հողատարածքներ, որոնցից 4-ը նախնական համաձայնությամբ հափշտակել է իր մտերիմ Ա. Մ.-ի հետ: Այս մասին NEWS.am-ը տեղեկանում է Հակակոռուպցիոն կոմիտեից։

Նախաքննությամբ պարզվել է, որ 2007-2014թթ. ընթացքում Գ. Մ.-ն, ՀՀ կադաստրի կոմիտեում տարբեր պաշտոններ զբաղեցնելով, մտերիմ հարաբերություններ է հաստատել նույն կառույցի այլ պաշտոնատար անձանց հետ: Այնուհետեւ վերջիններիս օգնությամբ Գ. Մ.-ն 2016-2017թթ.-ին Ա. Մ.-ի հետ նախնական համաձայնությամբ մտադրվել է դիտավորությամբ փաստերը խեղաթյուրելու միջոցով հափշտակել առանձնապես խոշոր չափերի համայնքային եւ պետական սեփականություն հանդիսացող շուրջ 80 հազ. քառակուսի մետր ընդհանուր մակերեսով հողատարածքներ:

Հանցավոր մտադրության մասին Գ. Մ.-ն եւ Ա. Մ.-ն տեղեկացրել են իրենց ազգականներին եւ մտերիմ անձանց, ապա ստանալով հանցագործության կատարմանն օժանդակելու եւ հնարավոր խոչընդոտները վերացնելու վերաբերյալ վերջիններիս համաձայնությունը` ձեռնամուխ են եղել հափշտակության կատարմանը: Մասնավորապես` հափշտակության առարկա հանդիսացող հողամասերի կադաստրային գործերին կցելու եւ օգտագործելու նպատակով կազմվել են պետական, ինչպես նաեւ Երեւան համայնքի սեփականություն հանդիսացող հողերի աճուրդային վաճառքի եւ վարձակալության իրավունքի մրցույթի արդյունքները հաստատելու մասին կեղծ փաստաթղթեր, այդ թվում` Երեւանի քաղաքապետի կեղծ որոշումներ, հողամասի առուվաճառքի կեղծ պայմանագրեր եւ այլն, որոնց մի մասը ստորագրվել եւ շրջանառության մեջ են դրվել Գ.Մ.-ին եւ Ա. Մ.-ին օժանդակած անձանց կողմից:

Այնուհետեւ` Գ. Մ.-ի եւ Ա. Մ.-ի կազմակերպմամբ ու միջնորդությամբ, մի շարք պաշտոնատար անձանց կողմից պաշտոնեական դիրքի չարաշահման եւ պաշտոնեական կեղծիքների արդյունքում, ՀՀ կադաստրի կոմիտեի տարածքային ստորաբաժանման մատյանի արդեն իսկ լրացված էջերը փոխարինվել են կեղծ գրառումներ պարունակող էջերով, իսկ մյուս կեղծ փաստաթղթերը դարձվել են հափշտակության առարկա հանդիսացող հողամասերի կադաստրային գործերի փաստաթղթեր: Արդյունքում կատարվել է գրանցման ոչ ենթակա հողամասերի պետական գրանցում, եւ դրանց վերաբերյալ տրվել են անշարժ գույքի սեփականության (օգտագործման) իրավունքի գրանցման կեղծ վկայականներ, ինչն էլ ստեղծել է հափշտակված գույքը փաստացի տնօրինելու հնարավորություն:

Նախաքննության ընթացքում հիմնավորվել է, որ Գ. Մ.-ի եւ Ա. Մ.-ի կողմից հափշտակվել են ներքոհիշյալ համայնքային եւ պետական սեփականություն հանդիսացող հողատարածքները, որոնք ձեւակերպվել են վերջիններիս օժանդակած տարբեր անձանց անուններով:

ՀՀ կառավարության որոշմամբ սեփականության իրավունքով անհատույց Երեւան համայնքին փոխանցված հողամասը կեղծ փաստաթղթերի միջոցով ձեւակերպվել է Ա. Ն.-ի անվամբ եւ հետագայում Գ. Մ.-ի ու Ա. Մ.-ի կազմակերպմամբ շուրջ 122 մլն ՀՀ դրամով օտարվել այլ անձանց:

ՀՀ հողային օրենսգրքի 60-րդ հոդվածի համաձայն` քաղաքացիներին եւ իրավաբանական անձանց սեփականության իրավունքով չփոխանցվող հողամասերի ցանկում ընդգրկված, առանձնապես խոշոր չափերով` շուրջ 560 մլն ՀՀ դրամ եւ 389 մլն ՀՀ դրամ շուկայական արժեքներով հողամասերը կեղծ փաստաթղթերի միջոցով ձեւակերպվել են համապատասխանաբար Բ. Գ.-ի եւ Ա. Մ.-ի անուններով:

ՀՀ կառավարության որոշմամբ սեփականության իրավունքով անհատույց Երեւան համայնքին փոխանցված, առանձնապես խոշոր չափերով` 415 մլն ՀՀ դրամ շուկայական արժեքով հողամասը կեղծ փաստաթղթերի միջոցով ձեւակերպվել է Ա. Ս.-ի անունով:

Նախաքննությամբ պարզվել է նաեւ, որ նշված հողատարածքներից բացի Գ. Մ–ի կողմից տարբեր անձանց օժանդակությամբ հափշտակվել է`

Քաղաքացիներին եւ իրավաբանական անձանց սեփականության իրավունքով չփոխանցվող հողամասերի ցանկում ընդգրկված, առանձնապես խոշոր չափերով՝ 1,008 մլրդ ՀՀ դրամ եւ 988 մլն ՀՀ դրամ շուկայական արժեքներով հողամասերը կեղծ փաստաթղթերի միջոցով ձեւակերպվել են համապատասխանաբար Ա. Հ.-ի եւ Լ. Դ.-ի անուններով:

ՀՀ կառավարության որոշմամբ սեփականության իրավունքով անհատույց Երեւան համայնքին փոխանցված, առանձնապես խոշոր չափերով` 1,039 մլրդ ՀՀ դրամ շուկայական արժեքով հողամասը կեղծ փաստաթղթերի միջոցով ձեւակերպվել է Կ. Ի.-ի անունով:

Գ. Մ.-ին եւ Ա. Մ.-ին մեղադրանք է ներկայացվել հանցավոր արարքը կատարելու պահին  գործող ՀՀ քրեական օրենսգրքի (ուժի մեջ է մտել՝ 01.08.2003 թվականին, ուժը կորցրել է՝ 01.07.2022) 178-րդ հոդվածի 3-րդ մասի 1-ին կետով: Նրանց նկատմամբ որպես խափանման միջոց է ընտրվել կալանավորումը:

Գ. Մ.-ին եւ Ա. Մ.-ին օժանդակած եւս չորս անձի մեղադրանք է ներկայացվել հանցավոր արարքը կատարելու պահին  գործող ՀՀ քրեական օրենսգրքի (ուժի մեջ է մտել՝ 01.08.2003 թվականին, ուժը կորցրել է՝ 01.07.2022) 38-178-րդ հոդվածի 3-րդ մասի 1-ին կետով:

Նախաքննությունը շարունակվում է: Ձեռնարկվում են անհրաժեշտ քննչական գործողություններ եւ օպերատիվ-հետախուզական միջոցառումներ` համայնքային եւ պետական սեփականություն հանդիսացող հողատարածքների հափշտակության հանցավոր սխեմայում ընդգրկված բոլոր անձանց, այդ թվում` ՀՀ կադաստրի կոմիտեում եւ Երեւանի քաղաքապետարանում պաշտոններ զբաղեցրած, առերեւույթ պաշտոնեական դիրքը չարաշահած եւ պաշտոնեական կեղծիք կատարած անձանց ինքնությունները պարզելու ուղղությամբ: