նախընտրելի դարձնել
Իսրայելը մինչ նոյեմբերին կայանալիք ԱՄՆ միջանկյալ ընտրությունները համաշխարհային տերությունների հետ Իրանի միջուկային համաձայնագրի վերսկսում չի ակնկալում, հայտարարել է իսրայելցի պաշտոնյան այն բանից հետո, երբ բանակցություններում եվրոպական կողմերը հիասթափություն հայտնեցին Թեհրանի նկատմամբ, հաղորդում է Reuters-ը:
Շաբաթ օրը Մեծ Բրիտանիան, Ֆրանսիան եւ Գերմանիան ասացին, որ իրենք «լուրջ կասկածներ» ունեն Իրանի մտադրությունների վերաբերյալ այն բանից հետո, երբ վերջինս փորձեց կապել գործարքի վերսկսումն իր երեք միջուկային օբյեկտներում ուրանի հետքերի վերաբերյալ ՄԱԿ-ի դիտորդական հետաքննությունների ավարտի հետ:
«Այս պահին թվում է, որ Իրանի հետ միջուկային համաձայնագիրը չի ստորագրվի առնվազն մինչեւ ԱՄՆ միջանկյալ ընտրությունները»,- ասել է իսրայելցի պաշտոնյան՝ անանուն մնալու պայմանով:
Որոշ իսրայելցի մեկնաբաններ այդ դիտողությունը որպես ԱՄՆ նախագահ Ջո Բայդենի կողմից մինչեւ քվեարկությունը գործարք կնքելու ցանկության բացակայություն են մեկնաբանել, որպեսզի հանրապետական մրցակիցները չօգտագործեն դա իր Դեմոկրատական կուսակցության դեմ քարոզարշավներում:
Նախօրեին վարչապետ Յաիր Լապիդը շնորհակալություն էր հայտնել եվրոպական տերություններին «վճռական դիրքորոշման համար»։ «Իսրայելը հաջող դիվանագիտական արշավ է իրականացնում՝ միջուկային գործարքի դադարեցման եւ Իրանի դեմ պատժամիջոցների չեղարկումը կանխելու համար,- ասել է նա։- Սա դեռ վերջը չէ։ Ճանապարհը երկար է։ Բայց կան հուսադրող նշաններ»:
