նախընտրելի դարձնել
Նիգերի բնակիչները պատրաստվում են պատերազմի տարածաշրջանի երկրների հետ, որոնք սպառնում են ներխուժմամբ, տեղեկացրել է The Associated Press-ը։
Մայրաքաղաք Նիամեյի բնակիչները կամավորականների հավաքի կոչ են անում՝ օգնելու համար բանակին տարածաշրջանի երկրների ECOWAS դաշինքի ներխուժման դեպքում, եթե խունտան պաշտոնում չվերականգնի տապալված նախագահ Մուհամեդ Բազումին։ ECOWAS-ը գործի է դրել «պահուստային ուժերը»՝ Նիգերում կարգը վերահաստատելու համար։
Ինչպես երեքշաբթի հայտարարել է նախաձեռնության հիմնադիրներից Ամսարու Բակոն, նախաձեռնությունը նպատակ ունի հավաքագրելու տասնյակ հազարավոր կամավորականների, որոնք կմարտնչեն, բուժօգնություն կցուցաբերեն, կապահովեն տեխնիկական եւ ինժեներական մատակարարում եւ կկատարեն այլ գործառույթներ։
Անցած շաբաթ խունտան հայտարարել էր, որ ECOWAS-ի հետ երկխոսության համար բաց է այն բանից հետո, երբ մերժել է դաշինքի՝ բանակցելու բազմաթիվ փորձերը, բայց դրանից շատ չանցած մեղադրել է Բազումին պետական դավաճանության մեջ եւ հետ է կանչել դեսպանին հարեւան Կոտ դ՛Իվուարից։
Սպասվում է, որ այս շաբաթ ECOWAS-ը «ռեզերվային ուժեր» կգործադրի։ Առայժմ պարզ չէ, թե երբ եւ արդյոք այդ ուժերը ներխուժում կիրականացնեն, բայց, հավանաբար, դրանք կներառեն մի քանի հազար զինծառայողների եւ կործանարար հետեւանքներ կունենան, նշում են փորձագետները։
