նախընտրելի դարձնել
Իսրայելի դիվանագետները հոկտեմբերի 19-ի դրությամբ լքել են Թուրքիան։ Այս մասին հայտարարել են դիվանագիտական աղբյուրները՝ մեկնաբանելով Իսրայելի արտգործնախարար Էլի Քոհենի հայտարարությունը Թուրքիայից իր դիվանագետներին հետ կանչելու մասին, տեղեկացնում է Anadolu-ն։
«Ներկայումս Թուրքիայում իսրայելցի դիվանագետներ չկան։ Հոկտեմբերի 19-ի դրությամբ նրանք արդեն լքել էին երկիրը։ Հոկտեմբերի 18-ին մեր նախարարությանն ուղարկած նոտայում ասվում էր, որ վերջին իրադարձությունների լույսի ներքո դեսպանատների դիվանագետները հոկտեմբերի 19-ից կլքեն Թուրքիան»,- ասել է աղբյուրը։
«Դժվար է հասկանալ, թե Քոհենը ում է ուղղել այդ հրամանը։ Քանի որ դիվանագետները, որոնց մասին նա խոսում էր, արդեն լքել էին մեր երկիրը»,- հավելել է աղբյուրը։
Իսրայելցի դիվանագետները, այդ թվում՝ Անկարայում Իսրայելի դեսպան Իրիտ Լիլիանը, հոկտեմբերի 19-ին որոշել էին հեռանալ Թուրքիայից՝ «անվտանգության» նկատառումներով։
Ավելի վաղ Իսրայելի ԱԳՆ ղեկավարը հայտնել էր, որ Թուրքիայից հետ է կանչում դիվանագետներին՝ երկկողմ հարաբերությունները վերագնահատելու համար։
«Թուրքիայի կողմից կոշտ հայտարարությունների ֆոնին ես հրամայեցի վերադարձնել դիվանագիտական ներկայացուցիչներին՝ իսրայելա-թուրքական հարաբերությունները վերանայելու նպատակով»,- X սոցցանցում գրել է Իսրայելի նախարարը։
