նախընտրելի դարձնելՀայաստանի փոխվարչապետ, տարածքային կառավարման նախարար Արմեն Գեւորգյանն այսօր ընդունել է ՄԱԿ-ի Մանկական հիմնադրամի (UNICEF) հայաստանյան գրասենյակի նորանշանակ ներկայացուցիչ Մանյա Հենրիեթ Ահրենսին եւ կառույցի հրավերով Հայաստանում գտնվող Երեխայի իրավունքների հարցերով հանձնաժողովի նախկին նախագահ, պրոֆեսոր Յաապ Դոյքին:
ՏԿՆ մամուլի ծառայությունից NEWS.am-ին հայտնում են, որ փոխվարչապետը նախ շնորհավորել էտիկին Ահրենսին` Հայաստանում առաքելությունը ստանձնելու կապակցությամբ` նշելով, որ վերջին շրջանում UNICEF-ի հայաստանյան գրասենյակի հետ արդյունավետ համագործակցություն է ծավալվել, ձեւավորվել է համատեղ աշխատանքի հարուստ փորձ եւ հույս է հայտնել, որ գործակցությունը կշարունակվի:
Ա. Գեւորգյանը տեղեկացրել է, որ վերջին տարիներին առավել մեծ ուշադրություն է դարձվում երեխաների իրավունքների պաշտպանության խնդիրներին, տարբեր ոլորտներում դրանց ուսումնասիրությանը: «Աշխատանքները փորձում ենք այնպես կազմակերպել, որպեսզի պետական ուշադրությունից ոչ մի երեխա դուրս չմնա»,- նշել է փոխվարչապետը` ներկայացնելով կատարված աշխատանքները: Մասնավորապես` մարզպետարաններում ձեւավորվել են երեխաների հիմնահարցերով զբաղվող բաժիններ, այս տարի ուսումնասիրություններ են կատարվել` դրանց հետագա աշխատանքի արդյունավետության բարձրացման նպատակով: ՀՀ բնակչության պետական ռեգիստրում իրականացվել է երեխաների հաշվառում: Նա բարձր է գնահատել այս ոլորտներում UNICEF-ի եւ հասարակական կազմակերպությունների հետ աշխատանքը:
Ա. Գեւորգյանն անդրադարձել է նաեւ սոցիալական պաշտպանության ոլորտում իրականացվող ինստիտուցիոնալ բարեփոխումներին, որով փորձ է արվում ներդնել սոցիալական մեկ ընդհանուր ընդունարանի գաղափարը:
Ահրենսն իր հերթին արդյունավետ համագործակցությունը շարունակելու պատրաստակամություն է հայտնել` նշելով, որ բարեփոխումների բարդ եւ դժվարին գործում UNICEF-ի հայաստանյան գրասենյակը պատրաստակամ է ամենայն աջակցություն ցուցաբերել Հայաստանի իշխանություններին:
Նշվել է, որ գրասենյակի հրավերով Հայաստանում գտնվող պրն Դոյքը շահագրգիռ կառույցներին ներկայացնելու է իր դիտարկումները` Երեխայի իրավունքների մասին կոնվենցիայի մասով Հայաստանի վերջին զեկույցի վերաբերյալ: Հայաստանում պրն Դոյքի մասնակցությամբ կազմակերպվելիք քննարկումները հնարավորություն կստեղծեն բացահայտելու գործունեության այն ոլորտները, որտեղ աշխատանքը կարող է բարելավել Հայաստանում երեխաների, մասնավորապես` առավել խոցելի երեխաների կյանքը:
