Ուրբաթ լույս մարտի 29-ի գիշերը Հյուսիսային Ռեյն-Վեստֆալիա դաշնային նահանգի A44 ավտոճանապարհին ավտոբուսի վթարի հետևանքով ավելի քան 20 մարդ վիրավորվել է։ Ավտոբուսը, որում եղել է մոտ 60 ուղեւոր, չպարզված հանգամանքներում դուրս է եկել ճանապարհի երթեւեկելի հատվածից եւ շրջվել Վերլ գյուղի մոտ։

Ոստիկանության հաղորդած նախնական տվյալներով՝ վթարի հետևանքով այլ տրանսպորտային միջոցներ չեն ներգրավվել։ Ավտոբուսը տեղափոխում էր Հեսսենի հետ սահմանին գտնվող Վարբուրգի արհեստագործական քոլեջի ուսանողներին, ովքեր տուն էին վերադառնում Անգլիա ճամփորդությունից հետո: Ըստ տեղեկությունների՝ 20 մարդ թեթեւ վնասվածքներ է ստացել, մեկը՝ ծանր, սակայն նրա կյանքին վտանգ չի սպառնում։ 

Վթարից հետո ավտոճանապարհի մի կողմից երթեւեկությունը արգելափակվել է, իսկ երթեւեկության սահմանափակումները կարող են տևել ևս մի քանի ժամ։ Շրջված ավտոբուսի վարորդը չի տուժել.

Ընդամենը մեկ օր առաջ՝ մարտի 27-ի առավոտյան, լուրջ վթար է տեղի ունեցել Լայպցիգի մերձակայքում գտնվող A9 ավտոճանապարհին, որտեղ անհայտ պատճառով FlixBus ավտոբուսը, որում եղել է ավելի քան 50 ուղևոր, դուրս է եկել ճանապարհից։ Վթարի հետևանքով չորս մարդ զոհվել է, վեցը՝ ծանր, իսկ 29-ը՝ թեթև վիրավորվել։

Ողբերգության հանգամանքները պարզվում են, անզգուշությամբ սպանություն կատարելու կասկածանքով ավտոբուսների երկու վարորդների՝ 62 և 53 տարեկան անձանց նկատմամբ հետաքննություն է սկսվել, գրում է Leipziger Volkszeitung-ը՝ վկայակոչելով ոստիկանության ներկայացուցչին։