Միացյալ Նահանգները պետք է թարմացնի իր միջուկային զինանոցը, որպեսզի հնարավոր լինի հակազդել Ռուսաստանին և Չինաստանին: Նման կարծիք է հայտնել ամերիկյան Newsweek ամսագիրը՝ վկայակոչելով փորձագետներին։

Նյութի հեղինակները «խորը մտահոգություն» են հայտնում ռազմական առումով Ռուսաստանի Դաշնության և Չինաստանի սրընթաց զարգացման վերաբերյալ։ Սա հարց է առաջացնում, թե արդյոք Միացյալ Նահանգները բավականաչափ ռեսուրսներ է հատկացնում իր «ծերացող միջուկային զենքի» արդիականացմանը։ «Եթե մենք իսկապես ցանկանում ենք լրջորեն զբաղվել 21-րդ դարի միջուկային զինանոցի կառուցմամբ և մրցակցել մեր հակառակորդների հետ, մենք պետք է երեկ իսկապես կարևոր որոշումներ կայացնեինք, բայց դա չարեցինք», - մեջբերում է ամսագիրն ԱՄՆ ռազմավարական և միջազգային ուսումնասիրությունների կենտրոնի ավագ աշխատակից (CSIS) Հիզեր Ուիլյամսը: Նրա կարծիքով, «առաջիկա հինգ տարին կամ նույնիսկ ավելի քիչը իսկապես վճռորոշ կլինեն» ԱՄՆ-ում ժամանակակից պայմաններին համարժեք միջուկային զինանոցի ձևավորման հարցում։

Պարբերականը նշում է, որ առաջիկա 10 տարում Միացյալ Նահանգները կիրականացնի հրթիռների և արձակման սիլոսների լուրջ արդիականացում, ինչը, ըստ ԱՄՆ զինվորականների, «կապահովի մարտունակությունը մինչև 2075 թվականը»։ Միևնույն ժամանակ, ըստ Ուիլյամսի, Միացյալ Նահանգները «չունի հստակ ռազմավարություն», թե ինչպես վարվել, օրինակ, Չինաստանի հետ կապված, որը, իբր, մինչև 2035 թվականը մտադիր է ստեղծել ԱՄՆ-ի և  Ռուսաստանի զինանոցին համապատասխան միջուկային եռյակ : «Վերջին մի քանի տարիների աշխարհաքաղաքական իրավիճակը կտրուկ մեծացրել է միջուկային զսպման կարևորությունը Միացյալ Նահանգների համար», - բացատրեց RAND Corporation վերլուծական կենտրոնի ավագ քաղաքագետ Կարլ Մյուլլերը:

ԱՄՆ Էներգետիկայի դեպարտամենտի Միջուկային անվտանգության ազգային վարչության փոխտնօրեն Ֆրենկ Ռոուզը մարտի 13-ին ասել է, որ ԱՄՆ կառավարությունը դիտարկում է իր միջուկային զինանոցի ընդլայնման հարցը՝ անվտանգության փոփոխվող մարտահրավերներին արձագանքելու համար, սակայն վերջնական որոշումներ չեն կայացվել: ԱՄՆ ռազմավարական հրամանատարության (STRATCOM) ռազմաօդային ուժերի գեներալ Էնթոնի Քոթոնը փետրվարի 29-ին հայտարարել է, որ Ռուսաստանն ունի ամենամեծ և բազմազան միջուկային զինանոցը։ Միևնույն ժամանակ, նրա խոսքով, Պեկինը ձգտում է կառուցել իր միջուկային զինանոցը։