Ճապոնիայի վարչապետ Ֆումիո Կիսիդան չորեքշաբթի անսպասելի հայտարարել է, որ չի մասնակցելու սեպտեմբերին կայանալիք քվեարկությանը կառավարող Լիբերալ-դեմոկրատական կուսակցության նախագահի պաշտոնում, ինչը ճանապարհ է բացում նոր վարչապետի համար, տեղեկացրել է АР-ը։

Կիսիդան Լիբերալ-դեմոկրատական կուսակցության նախագահ է ընտրվել 2021թ., եւ եռամյա ժամկետն սպառվում է սեպտեմբերին։

Ընտրարշավից նրա դուրս գալը նշանակում է, որ կուսակցական քվեարկության ժամանակ հաղթողը կփոխարինի նրան վարչապետի պաշտոնում, քանի որ ԼԴԿ-ն վերահսկում է խորհրդարանի երկու պալատները։

Կիսիդայի համար աջակցության ռեյթինգի անկում է գրանցվում, այն 20 տոկոսից ցածր է։

Նա հայտարարել է, որ չի առաջադրվի սեպտեմբերյան քվեարկության ժամանակ, որպեսզի հնարավորություն տա նոր ղեկավարին ցույց տալ, որ իր կուսակցությունը բարելավվում է։ Կիսիդայի խոսքով՝ նա կաջակցի նոր նախագահին։

Տարեսկզբին տեղական ընտրություններում կրած պարտությունը խափանել է նրա ազդեցությունը, եւ ԼԴԿ օրենսդիրները հայտնել են նոր նախագահի անհրաժեշտության մասին։

Այդ ժամանակվանից՝ կոռուպցիոն սկանդալից հետո, Կիսիդան կառավարությունից հեռացրել է մի շարք նախարարների եւ այլ անձանց, ցրել է կուսակցական խմբակցությունները, որոնք քննադատում էին «Փող շահի դիմաց» քաղաքականությունը, եւ ընդունել է օրենք, որը խստացրել է քաղաքական ֆոնդերի վերահսկման մասին օրենքը։ Սակայն նրա կառավարության աջակցությունն այդ ժամանակվանից շարունակել է անկում գրանցել։