նախընտրելի դարձնել
ԱՄՆ-ում նախագահի հանրապետական թեկնածու Դոնալդ Թրամփին և նրա դեմոկրատ մրցակից Քամալա Հարիսին չի հաջողվում հստակ առավելության հասնել Ջորջիայում և Հյուսիսային Կարոլինայում՝ հարավային երկու առանցքային նահանգներում: Այս մասին են վկայում CNN հեռուստաընկերության պատվերով SSRS ծառայության կողմից անցկացված հասարակական կարծիքի հարցման արդյունքները։
Ջորջիա նահանգում հարցման մասնակիցների 48%-ը պատրաստ է քվեարկել Թրամփի օգտին, 47%-ը նախընտրել է Հարիսին։ Իսկ Հյուսիսային Կարոլինայում ներկայիս փոխնախագահ Հարիսն առաջ է անցել Սպիտակ տան նախկին ղեկավարից՝ 48%-ն ընդդեմ 47%-ի արդյունքով:
Ինչպես նշում է CNN-ը, Հյուսիսային Կարոլինայի ընտրողները, որոնք 2008-ի ընտրություններում փոքր տարբերությամբ աջակցել էին դեմոկրատ Բարաք Օբամային, վերջին երեք նախագահական ընտրություններում քվեարկել են հանրապետականների օգտին։ Ջորջիայում 2020-ին Սպիտակ տան ներկայիս ղեկավար Ջո Բայդենը Թրամփից առաջ էր անցել 1 տոկոսից պակաս կետով՝ դառնալով 1992 թվականի Բիլ Քլինթոնից հետո նահանգում հաղթանակած առաջին դեմոկրատը։
Հարցումն անցկացվել է հոկտեմբերի 23-ից 28-ն ընկած ժամանակահատվածում առցանց և հեռախոսով։ Դրան մասնակցել է 732 հավանական ընտրող Ջորջիայում և 750 ընտրող՝ Հյուսիսային Կարոլինայում: Վիճակագրական սխալը կազմել է 4,5 տոկոսային կետ։
