նախընտրելի դարձնել
Ամերիկացիների կեսից ավելին կարծում է, որ նախագահ Դոնալդ Թրամփը չափազանց մտերիմ է Վլադիմիր Պուտինի հետ, ցույց է տվել Reuters/Ipsos-ի հարցումը: Հարցումն անցկացվել է երեքշաբթի և չորեքշաբթի օրերին, երբ Վաշինգտոնը Կիևի հետ պայմանավորվել է Ուկրաինայում 30-օրյա հրադադարի շուրջ։ Պուտինը Թրամփին փոխադարձությամբ չպատասխանեց. հինգշաբթի նա հրաժարվեց անմիջապես դադարեցնել կրակը։
Թրամփը, ով արմատապես փոխել է ԱՄՆ արտաքին քաղաքականությունը, «չափազանց սերտորեն կապված է» Ռուսաստանի հետ, ըստ հարցվածների մոտ 56%-ի, դեմոկրատների շրջանում այս կարծիքին է 89%-ը, իսկ հանրապետականների մոտ՝ 27%-ը։ Ընդհանուր առմամբ հարցվածների 40%-ը համաձայն չէ այս պնդման հետ, իսկ 4%-ը չի պատասխանել հարցին:
Իր հրապարակային ելույթներում Թրամփը բազմիցս նշել է, որ Պուտինը ժամանակին իրեն հանճար է անվանել։ Նա ինքն էլ նախկինում մեկ անգամ չէ, որ հիացմունք է հայտնել Պուտինի նկատմամբ, իսկ նախընտրական քարոզարշավի ժամանակ և դրանից հետո ասել է, որ իրենք հասկանում են միմյանց, ուստի կկարողանա խաղաղության բանակցություններ վարել Կրեմլի տիրոջ հետ։ Մոսկվայի հետ սիրախաղը ցնցել է Միացյալ Նահանգների եվրոպացի դաշնակիցներին, որոնք ստիպված են օգնել Ուկրաինային դիմակայել ռուսական ագրեսիային, և վտանգի տակ է դրել ինքն Ուկրաինան, նրա ղեկավարներն ու զինված ուժերը՝ ժամանակավորապես դադարեցնելով ամերիկյան զենքի և կարևոր հետախուզության մատակարարումները:
Այս մոտեցման գագաթնակետը Թրամփի և նրա փոխնախագահ Ջեյ Դի Վենսի միջև վիճաբանությունն էր մի կողմից, իսկ մյուս կողմից՝ Վլադիմիր Զելենսկին՝ Սպիտակ տան Օվալաձև գրասենյակի տեսախցիկների առջև։ Թրամփն ու Վենսը «սկսում են նմանվել Պուտինի օգտակար հիմարներին», - ասում է փոխնախագահի զարմիկ Նեյթ Վենսը, ով պատերազմի սկսվելուց ի վեր որպես կամավոր կռվում է ուկրաինական կողմում: «Վստահ եմ, որ Պուտինը փակ դռների հետևում ծիծաղում է այս բոլոր զիջումների վրա՝ իմանալով, որ չի պատրաստվում անել այն, ինչ ներկայիս վարչակազմն է ուզում»,- ասել է նա:
Թրամփն ասում է, որ Մոսկվայի հետ ավելի սերտ հարաբերություններ են անհրաժեշտ պատերազմին վերջ տալու համար։ Ինչ վերաբերում է ամերիկացիներին, շատերը, թեև կասկածում են նման քաղաքականությանը, բայց պաշտպանում են Ուկրաինայի հետ հարաբերություններ կառուցելու նախագահի ավելի գործնական մոտեցումը։
Հարցվածների գրեթե կեսը կամ 44%-ը նշել է, որ համաձայն է Թրամփի ծրագրին՝ «Ուկրաինային ռազմական աջակցությունը պայմանավորելու այն բանով, որ ԱՄՆ-ը ստանա Ուկրաինայի բնական ռեսուրսների մի մասը»: Գաղափարը պաշտպանել է հանրապետականների երկու երրորդը և դեմոկրատներից յուրաքանչյուր հինգերորդը:
