նախընտրելի դարձնել
Այլընտրանքային սպիտակուցներն ուսումնասիրող NECTAR ոչ առևտրային կազմակերպության վերջին հետազոտությունները գիտական բանավեճեր են առաջացրել բուսական ծագման մսի և կենդանական ծագման մսի համային տարբերությունների վերաբերյալ: Այս մասին գրում է Futurism-ը։
Մոտ 2700 մարդու մասնակցությամբ լայնածավալ կույր համտեսման ընթացքում հետազոտողները փորձել են հերքել մսի փոխարինիչների համի և որակի վերաբերյալ կանխակալ պատկերացումները:
Հետազոտության ընթացքում, որն անցկացվել է 2024 թվականի նոյեմբերից մինչև 2025 թվականի հունվար, մասնակիցներին առաջարկվել է 14 կատեգորիայի 122 բուսական արտադրանք, որոնցից յուրաքանչյուրը համեմատվել է սովորական մսի հետ, հայտնում է Фокус-ը։ Առանց իմանալու, թե ինչ ապրանք կստանան, համտեսողները գնահատել են դրանք՝ հիմնվելով հյուսվածքի, համի, տեսքի և սպառման ընդհանուր հաճույքի վրա: Թեև սովորական միսը հիմնականում ավելի բարձր գնահատականներ է ստացել, մասնակիցների առնվազն կեսը 20 բուսական ծագում ունեցող ապրանքներ գնահատել են որպես հավասար կամ ավելի լավ, քան իրենց մսային համանմանները:
Առանձնապես աչքի էր ընկնում Impossible Foods-ի հատուկ արտադրված հավի կրծքամիսը. համտեսողների 32%-ն այն նախընտրել է իրական մսից, իսկ ևս 28%-ը այն նույնքան հաճելի է համարել, որքան իսկական միսը:
Այս արդյունքները ցույց են տալիս, որ բուսական ծագման և ավանդական մսի միջև համային տարբերությունն ավելի է նեղանում: Սակայն հետազոտությունը միաժամանակ հայտնաբերել է ոլորտներ, որոնք արտադրողներից ավելի մեծ ուշադրություն են պահանջում:
Այնպիսի կատեգորիաները, ինչպիսին են բուսական բեկոնը և խոզի միսը, հետ են մնացել մյուսներից, և մասնակիցները նշել են համի և հյուսվածքի հետ կապված խնդիրները: Մասնավորապես հյուսվածքը շատերի համար կարևոր խնդիր էր, քանի որ բույսերի վրա հիմնված արտադրանքը 62%-ով ավելի քիչ հյութալի է, քան կենդանական ծագում ունեցող միսը:
