նախընտրելի դարձնել
Բուենոս Այրեսում հազարավոր մարդիկ են մասնակցել ֆեմիցիդի դեմ բողոքի ակցիային՝ պահանջելով արդարություն մի աղջկա և երկու երիտասարդ կնոջ համար, որոնք ենթարկվել են խոշտանգումների և սպանվել հանցագործության հետևանքով, որը ցնցել է Արգենտինան, հաղորդում է BBC News-ը։
15-ամյա Լարա Գուտիերեսի, ինչպես նաև 20-ամյա Մորենա Վերդիի և Բրենդա դել Կաստիլյոյի դաժան սպանությունները հեռարձակվել են ուղիղ եթերում սոցիալական ցանցերում։
Ոստիկանության կարծիքով, հանցագործությանն առնչություն ունի թմրամիջոցների վաճառքով զբաղվող մի ավազակախումբ, և սպանությունները իրականացվել են որպես նախազգուշացում մյուսների համար։
Արգենտինայի ազգային անվտանգության նախարար Պատրիսիա Բուլրիչին հայտնել է, որ ուրբաթ օրվա դրությամբ ձերբակալվել է հինգ կասկածյալ՝ երեք տղամարդ և երկու կին, սակայն 20-ամյա պերուացին, որը, ըստ իշխանությունների, խմբավորման ղեկավարն է, դեռ ազատության մեջ է։
Քննչական մարմինների վարկածով, զոհերին 2025 թվականի սեպտեմբերի 19-ին խաբեությամբ նստեցրել են միկրոավտոբուս՝ իբր երեկույթի մեկնելու համար։
Իշխանությունները հայտարարել են, որ դա եղել է «պատժելու» ծրագիր՝ խմբավորման վարքականոնները խախտելու համար, ինչը պետք է ծառայեր որպես նախազգուշացում մյուսների համար։
Բուենոս Այրեսի նահանգի անվտանգության նախարար Խավիեր Ալոնսոյի վկայությամբ, հարցաքննության ժամանակ ձերբակալվածներից մեկը ներկայացրել է դեպքի տեսագրությունը։
Տեսագրության մեջ լսվում է խմբավորման ղեկավարի խոսքը․ «Ահա թե ինչ է լինում նրանց հետ, ովքեր գողանում են իմ թմրանյութերը»։
Իշխանությունները հրապարակել են ենթադրյալ պերուացի քրեական հեղինակության լուսանկարը՝ հույսով, որ նրան կճանաչեն։
Երեք զոհերի մարմինները հայտնաբերվել են Բուենոս Այրեսի հարավային արվարձանում՝ նրանց անհետացումից հինգ օր անց։
Ըստ AFP-ի, Արգենտինայում ֆեմիցիդի մոնիտորինգի խմբի տվյալներով, յուրաքանչյուր 36 ժամը մեկ տղամարդը մեկ կնոջ է սպանում։
