Ամերիկյան Tesla ընկերությունն իր մատակարարներից պահանջել է ԱՄՆ-ում էլեկտրական ավտոմեքենաների արտադրության մեջ չինական բաղադրիչներ չօգտագործել, հաղորդում է The Wall Street Journal-ը՝ վկայակոչելով տեղեկացված աղբյուրներին։

Ըստ տեղեկությունների՝ Tesla-ն դեռևս 2025 թվականի սկզբին որոշել էր չինացի մատակարարներին հանել իր ամերիկյան մոդելների մատակարարման շղթայից։ Որոշ չինական բաղադրիչներ արդեն փոխարինվել են, իսկ մյուսների ամբողջական փոխարինումը նախատեսվում է առաջիկա մեկ-երկու տարիների ընթացքում։

Ամերիկյան ընկերությունն աստիճանաբար կրճատում է չինական բաղադրիչների օգտագործումն իր ավտոմեքենաներում կորոնավիրուսի համավարակի սկզբից ի վեր և այս տարի արագացրել է այդ գործընթացը ՝ չինական ներմուծման նկատմամբ բարձր մաքսատուրքերի սահմանումից հետո, նշում են աղբյուրները։

Միաժամանակ արտադրողը դժվարանում է մշակել կայուն գնագոյացման ռազմավարություն՝ ԱՄՆ-Չինաստան առևտրային հարաբերություններում անորոշության պատճառով։ Վերջին շաբաթներին Tesla-ն քննարկում է մատակարարման արագացված դիվերսիֆիկացումը՝ Չինաստանի և Նիդեռլանդների միջև Nexperia արտադրողի շուրջ վեճի արդյունքում ավտոմոբիլային չիպերի մատակարարման խափանումների պատճառով։

ԱՄՆ-ը դեռևս Tesla-ի ամենամեծ շուկան է, որտեղ ընկերությունը արտադրում է իր բոլոր ավտոմեքենաները ներքին պահանջարկի համար։ Միևնույն ժամանակ, Շանհայի գործարանը ավտոմեքենաներ է արտադրում Չինաստանի և ասիական ու եվրոպական երկրներ, բայց ոչ Միացյալ Նահանգներ արտահանման համար՝ օգտագործելով հիմնականում չինական բաղադրիչներ։