նախընտրելի դարձնել
Բելառուսի նախագահ Ալեքսանդր Լուկաշենկոն կրկին առաջարկել է բանակցություններ վարել Լիտվայի հետ և նշել է Բելառուսի համար հետաքրքրություն ներկայացնող կետերը։ Պետության ղեկավարը հայտարարությունն արել է Անվտանգության խորհրդի նիստում, հաղորդում է ԲԵԼՏԱ-ն։
Նա վստահեցրել է, որ Բելառուսը պատրաստ է նորմալ հարաբերություններ կառուցել բոլոր ոլորտներում։
«Մենք միշտ կպայմանավորվենք Լիտվայի ժողովրդի հետ։ Ինչպես նաև լեհերի։ Նրանք մեր մարդիկ են։ Իսկ եթե ուզում եք նորմալ հարաբերություններ, նստեք բանակցությունների սեղանի շուրջ և քննարկեք այդ խնդիրները։ Մենք դրան պատրաստ ենք։ Այլ տարբերակներ չկան, - հայտարարել է Բելառուսի ղեկավարը։ - Ի՞նչն էր խանգարում Լիտվային համագործակցել մեզ հետ։ Մենք բեռնում էինք նրանց նավահանգիստները՝ Լիտվայի բյուջեի 30%-ը ձևավորվում էր մեր բեռների հոսքի հաշվին։ Էլ ի՞նչ էր պակասում։ Ինչի՞ց խելագարվեցին»։
Լուկաշենկոն հայտարարել է, որ Լիտվայում այժմ «աղմուկ» է բարձրացել Վիլնյուսի կողմից սահմանը փակելուց հետո Բելառուսում մնացած մեքենաների պատճառով։
«Եթե նրանք (մեքենաները - ԲԵԼՏԱ-ի նշում) ընկած են ճամփեզրին, գուցե Լիտվայում դա նորմալ է։ Մեզ մոտ դա անընդունելի է։ Մենք դրանք տեղադրել ենք կայանատեղերում, պահպանում ենք, որպեսզի ոչ ոք չմտնի այդ մեքենաները, որպեսզի բեռը պահպանվի։ Պետք չէ «հիմարությունից» բղավել ու աղմկել։ Պետք չէ ներգրավել ամերիկացիներին, ռուսներին կամ ուկրաինացիներին։ Այս համարը չի անցնի։ Այս թեման մեր բանակցությունների և մեր հարաբերությունների հարթությունում է», - ասել է Բելառուսի նախագահը։
