Ավստրալիայի կառավարության նախարարները կտրուկ քննադատության են բախվել՝ երկրի դաշնային բյուջեի հաշվին չափազանց հաճախակի ճանապարհորդությունների և ընտանեկան արձակուրդների պատճառով։ Ինչպես հայտնել է The Australian թերթը, ընդդիմության ներկայացուցիչները պահանջում են ստուգել գործուղման ծախսերի հիմնավորվածությունը և վերանայել նախարարների կաբինետի անդամների և նրանց ընտանիքների համար արտոնությունների և փոխհատուցումների գործող համակարգը։

Կառավարության հասցեին հնչած քննադատության պատճառ է դարձել Հաղորդակցության և սպորտի նախարար Անիկա Ուելսի ընտանեկան ուղևորությունը, որը եղել է Սիդնեյից 500 կմ հարավ-արևմուտք գտնվող Թրեդբո լեռնադահուկային հանգստավայրում։ Այս ճանապարհորդությունը, որը կապ չի ունեցել նախարարի աշխատանքի հետ, արժեցել է ավելի քան 3 հազար ավստրալական դոլար (2 հազար ԱՄՆ դոլար) և ամբողջությամբ վճարվել է դաշնային բյուջեի հաշվին։ «Ուելսը բացարձակապես անմրցակից է։ Իմ գործընկերներից (պատգամավորներից) ոչ ոք հարկատուների հաշվին լեռնադահուկային հանգստի չի գնացել», — հայտարարել է ընդդիմադիր Ավստրալիայի Լիբերալ կուսակցության ներկայացուցիչ Ջեյմս Փաթերսոնը՝ առաջարկելով անհապաղ «փոխել նախարարների գործուղման ծախսերի չափը կարգավորող կանոնները»։

Բացի այդ, տեղական լրատվամիջոցները պարզել են, որ Ուելսը բյուջեից նաև մոտ 100 հազար ավստրալական դոլար (66,6 հազար ԱՄՆ դոլար) է ծախսել՝ Նյու Յորք և Փարիզ կատարած ընտանեկան ուղևորությունների համար, ինչպես նաև տոմսեր է գնել մարզական մրցումների համար՝ ծախսելով ևս 8,5 հազար ավստրալական դոլար (5,6 հազար ԱՄՆ դոլար)։ Հրապարակվել են նաև առևտրի և զբոսաշրջության նախարար Դոն Ֆարելի գործուղման ծախսերի մասին տվյալներ, որը բյուջեից մոտ 50 հազար ավստրալական դոլար (33 հազար ԱՄՆ դոլար) է ծախսել իր ընտանիքի անդամների ավիաթռիչքների համար։

Երկրի վարչապետ Էնթոնի Ալբանեզեն ընդունել է քննադատության հիմնավորվածությունը, սակայն հրաժարվել է փոխել կաբինետի անդամների գործուղման ծախսերի վերաբերյալ գործող կանոնները։ «Իրավիճակը վիճելի է և ես լիովին հասկանում եմ դա, ինչպես նաև հասկանում եմ, որ հարկատուներն իրավունք ունեն հույս դնել իրենց միջոցների օպտիմալ ծախսման վրա։ Նախարար Ուելսը դիմել է Ծախսերի վերահսկման խորհրդարանական վարչություն, որը կգնահատի ուղևորությունը, իսկ մենք կսպասենք համապատասխան հանձնարարականներին», — ասել է վարչապետը՝ ընդգծելով, որ «իր կառավարությունը չի սահմանել նախարարների համար արտոնություններ և փոխհատուցումներ երաշխավորող կանոնները»։

Ավստրալիայի գործող օրենսդրության համաձայն՝ դաշնային խորհրդարանի պատգամավորները և կառավարության անդամներն իրենց և ընտանիքի անդամների համար ունեն տրանսպորտային ծախսերը վճարելու իրավունք։ Ընդ որում, խորհրդարանականներին թույլատրվում է փոխհատուցում ստանալ իրենց հայրենի քաղաքի և Կանբերայի միջև բիզնես դասի ինը ուղևորության, ինչպես նաև Ավստրալիայի այլ վայրեր էկոնոմ դասի երեք ուղևորության համար։ Նախարարները, Սենատի նախագահը, Ներկայացուցիչների պալատի խոսնակը և ընդդիմության ղեկավարները կարող են բյուջեի հաշվին անսահմանափակ թվով ուղևորություններ վճարել իրենց և ընտանիքի անդամների համար։