Գերմանիայի սոցիալ-դեմոկրատները ցանկանում են լիովին արգելել սոցիալական ցանցերը 14 տարեկանից փոքր երեխաների համար, հաղորդում է DW-ն։

Գերմանիայի փոխկանցլեր Լարս Քլինգբեյլը Բունդեսթագում աջակցել է SPD խմբակցության պահանջներին։ «Մենք այլևս չենք կարող յոլա գնալ առանց հստակ կանոնների և սահմանափակումների»։ (…) Երիտասարդներին սոցիալական ցանցերում ատելության և բռնության հեղեղից պաշտպանելը գերակա խնդիր է»,- Der Spiegel հանդեսին տված հարցազրույցում ասել է նա։

Ֆրանսպրես գործակալության տվյալներով՝ ըստ սոցիալ-դեմոկրատների խմբակցության մշակած փաստաթղթի՝ 14 տարեկանից փոքր երեխաների համար պետք է սոցիալական ցանցերի օգտագործման «լիակատար արգելք» մտցվի։

16 տարեկանից փոքր երիտասարդների համար պետք է ներդրվի «պարտադիր երիտասարդական տարբերակ», որն, ի թիվս այլ բաների, չպետք է ցուցադրի անհատականացված բովանդակություն կամ պարունակի «կախվածություն առաջացնող գործառույթներ, մասնավորապես՝ անվերջ թերթումները, բովանդակության ավտոմատ վերարտադրությունը, push ծանուցումները, խաղերում ընդգրկման կամ ինտենսիվ կամ մշտական ​​օգտագործման վրա հիմնված պարգևատրման համակարգերը»։ Խորհրդարանականներն առաջարկում են այդ տարբերակի հասանելիության համար ծնողի կամ խնամակալի թույլտվություն պահանջել։