նախընտրելի դարձնել
Մեծ Բրիտանիայի վարչապետ Քիր Սթարմերը հրաժարվում է ռազմանավեր ուղարկել Հորմուզի նեղուցում նավագնացությունը վերականգնելու համար՝ չնայած ԱՄՆ նախագահ Դոնալդ Թրամփի խնդրանքին։ Այս մասին հայտնում է The Daily Telegraph թերթը։
Ըստ պարբերականի՝ այն փաստը, որ Սթարմերը մերժել է Թրամփի խնդրանքը, կարող է է՛լ ավելի վատթարացնել երկու առաջնորդների հարաբերությունները։ Սպիտակ տան ղեկավարն արդեն իսկ դժգոհություն էր հայտնել այն կապակցությամբ, որ Լոնդոնը թույլ չի տվել օգտագործել իր ռազմաբազաները՝ Իրանի ուղղությամբ առաջին հարվածը հասցնելու համար։
Մարտի 15-ին The Sunday Times թերթը, հղում անելով իր աղբյուրին, հայտնել էր, որ Միացյալ Թագավորության պաշտպանության նախարարությունը ուսումնասիրում է Հորմուզի նեղուցում ական որոնող անօդաչու սարքեր ուղարկելու հնարավորությունը։ Թագավորության էներգետիկ անվտանգության և ածխածնային չեզոքության նախարար Էդ Միլիբենդը Sky News հեռուստաալիքին տված հարցազրույցում հաստատել է, որ նման տարբերակը քննարկվում է։
