Գերմանիայի նախագահ Ֆրանկ-Վալտեր Շտայնմայերը ԱՄՆ նախագահ Դոնալդ Թրամփին համեմատել է Ռուսաստանի առաջնորդ Վլադիմիր Պուտինի հետ՝ հայտարարելով, որ նրանք երկուսն էլ կործանել են իրենց երկրների հարաբերությունները Եվրոպայի հետ, հայտնում է The Telegraph-ը:

Շտայնմայերը խիստ քննադատության է ենթարկել Իրանում Թրամփի իրականացրած ռազմական գործողությունները և կարծիք հայտնել, որ անդրատլանտյան դաշինքի համար «հետադարձ ուղի» չկա այն պահից ի վեր, երբ Թրամփը ստանձնել է իր պաշտոնավարման երկրորդ ժամկետը:

«Ես կարծում եմ, որ Ռուսաստանի հետ հարաբերություններում հետադարձ ուղի չի լինի դեպի մինչև 2022 թվականի փետրվարի 24-ն ընկած ժամանակաշրջանը, նաև կարծում եմ, որ անդրատլանտյան հարաբերություններում հետադարձ ուղի չի լինի դեպի մինչև 2025 թվականի հունվարի 20-ն ընկած շրջանը», — ասել է նա՝ նկատի ունենալով Ռուսաստանի լայնամասշտաբ ներխուժումն Ուկրաինա և Թրամփի երդմնակալության օրը։

Գերմանիայի արտաքին գործերի նախարարության 75-ամյակին նվիրված ելույթում Շտայնմայերը Թրամփի սանձազերծած պատերազմն անվանել է «աղետալի, կանխելի և անօգուտ»՝ նշելով, որ այն դարձել է ԱՄՆ-ի և Եվրոպայի հարաբերությունների նորագույն «հատակը»։

«Այս պատերազմը միջազգային իրավունքի խախտում է, և դրանում որևէ կասկած լինել չի կարող։ Այն արդարացումը, թե իբր ԱՄՆ-ի դեմ անխուսափելի հարձակման վտանգ է եղել, որևէ քննադատության չի դիմանում. ըստ ամենայնի, այդպիսին է եղել նաև ամերիկյան հետախուզական ծառայությունների առնվազն մի մասի կարծիքը»,— ասել է Շտայնմայերը։

«Այս պատերազմը աղետալի քաղաքական սխալ է, և ամենից շատ ինձ հիասթափեցնում է այն փաստը, որ դրանից հնարավոր էր խուսափել, եթե նպատակն իրոք Իրանին միջուկային զենքի ճանապարհին կանգնեցնելն էր»,— հավելել է նա։

ԱՄՆ նախագահի հասցեին նրա հայտարարությունները երբևէ հնչած ամենախիստ քննադատական դիտողություններից են, որոնք արվել են Գերմանիայի նախագահի կողմից. մի պաշտոն, որը հիմնականում արարողակարգային բնույթ է կրում և համարվում է վերկուսակցական քաղաքականությունից բարձր:

Ավելի ուշ Իրանի արտաքին գործերի նախարար Աբբաս Արաղչին մեկնաբանել է այս հայտարարությունը՝ տալով դրան բարձր գնահատական