Ճապոնիայի Ակիհիտո կայսեր հանգուցյալ զարմիկ արքայազն Տամոհիտոյի ավագ դուստրը՝ արքայադուստր Ակիկոն, ուշագնաց լինելուց հետո հիվանդանոց է տեղափոխվել։ Արքայադուստրը գիտակցությունը կորցրել է օդանավակայանում Հնդկաստանից վերադարձող Ակիհիտո կայսերը եւ Միտիկո կայսրուհուն դիմավորելու հանդիսավոր արարողության ընթացքում։ Կայսերական զույգը Հնդկաստան էր մեկնել պաշտոնական այցով։
Բժիշկների խոսքով՝ արքայադուստրը գիտակցությունը կորցրել է արյան ճնշման կտրուկ անկման հետեւանքով, հայտնում է Ճապոնիայի կայսերական տան վարչությունը։
Թեեւ այժմ Ակիկոյի վիճակը կայունացել է, սակայն նա ստիպված հետաձգել է իր այցը Հավանա։
Ակիկոյի կրտսեր քույրը՝ արքայադուստր Յոկոն էլ հիվանդանոց է տեղափոխվել որովայնի հատվածում ցավերի պատճառով, բժիշկները գաստրոէնտերիտ (ստամոքսաաղիքաբորբ) են կասկածում, փոխանցում է «ՌԻԱ Նովոստին»՝ վկայակոչելով «Կիոդո» գործակալությունը։
Նշենք, արքայադուստրերի հայրը՝ արքայազն Տամոհիտոն, ճապոնական գահի ժառանգորդների ցուցակում վեցերորդն էր։ Նա քաղցկեղից մահացել է 2012թ.՝ 66 տարեկան հասակում։