«Americana at Brand» առեւտրի կենտրոնը ներողություն է խնդրել հայ ձեռնարկատերերից այն բանի համար, որ կենտրոնի տնօրինությունն արգելել է Հայոց ցեղասպանության զոհերի հիշատակին նվիրված շապիկներ վաճառել:
«Մենք կցանկանայինք ներողություն խնդրել վաճառասեղանը վարձակալող Թինա Չուլջյանից, Ալեքս Կոդագոլյանից եւ Արմին Հարիրիից՝ նրանց կողմից վաճառվող ապրանքների հետ կապված թյուրիմացության համար»,-ասվում է առեւտրային կենտրոնի տարածած հայտարարությունում: Այնտեղ նաեւ նշվում է, որ այդ ապրանքների վաճառքը ավելի քան ողջունելի է, հաղորդում է «Asbarez»-ը:
Ավելի վաղ NEWS.am-ը հայտնել էր, որ անցյալ ամիս երեք հայ երիտասարդ գործարարներ վաճառասեղան էին վարձակալել Գլենդելում գտնվող «Ամերիկանա» առեւտրային, ռեստորանային եւ թատերական մեծ համալիրում՝ իրենց shop1915.comկայքում գովազդվող շապիկները, գլխարկները եւ հագուստի պարագաները վաճառելու համար:
Փետրվարի 25-ին «Ամերիկանան» վերջնագիր է ներկայացրել Թինային եւ նրա երկու գործընկերներին, որ 24 ժամվա ընթացքում նրանք պետք է փոխեն վաճառքի հանված իրենց ապրանքատեսականին, պնդելով, որ բողոքներ են եղել «ցեղասպանության» հագուստ վաճառելու մասին: Հակառակ դեպքում, նրանք ընդամենը երեք օր ունեն տարածքն ազատելու համար:
Մտահոգվելով, որ իրենք վտարման եզրին են, գործարարները համաձայնել էին չցուցադրել հայկական շապիկները եւ դրանք վաճառել միայն հաճախորդների պահանջի դեպքում: Նույն օրը կեսօրից հետո «Ամերիկանայի» մի պաշտոնյա վերահաստատել էր, որ «ցեղասպանության» թեմայով հագուստի բոլոր տարրերը պետք է ամբողջությամբ հեռացնել վաճառասեղանի վրայից: