Գյումրիում ապրիլի 6-ի գիշերը դաժան ծեծի ենթարկված 48-ամյա Արթուր Պետրոսյանի վիճակը դեռեւս ծանր կայուն է: Այս մասին NEWS.am-ին ասաց «Գյումրի» բժշկական կենտրոնի տնօրեն Արմեն Իսահակյանը:
Նա հայտնեց, որ Արթուր Պետրոսյանը գտնվում է վերակենդանացման բաժանմունքում:
«Հետվիրահատական շրջանում է գտնվում Արթուր Պետրոսյանը, դեպքի մասին դեռեւս խոսել չի ցանկանում: Բացի դրանից՝ քննիչներն էլ որեւէ գործողություն այս պահին չեն կատարում»,- ասաց հիվանդանոցի տնօրենը:
Նշենք, որ Արթուր Պետրոսյանի մոտ ախտորոշվել է գանգուղեղային փակ վնասվածք, կրծքավանդակի եւ որովայնի բութ վնասվածքներ, ուղեղի ցնցում, փայծախի եւ միզապարկի պատրվածքներ:
Մեր տեղեկություններով՝ ծեծի ենթարկվածն ավտոբուսի վարորդ է, աշխատում է Գյումրիի 40 համարի երթուղայինում:
Հիշեցնենք, որ ոստիկանության նյութեր են նախապատրաստվում՝ պարզելու դեպքի հանգամանքները:
