Սեւանա լճում կորած քաղաքացուն արդեն 15 օր է՝ որոնում են, սակայն ոչ մի արդյունք: Այգեստանի գյուղապետ Սոկրատ Հովսեփյանը NEWS.am-ի թղթակցի հետ զրույցում ասաց, որ այդպես էլ իրենց համագյուղացի Ա.Մ.-ն չի հայտնաբերվել: Նա նշեց, որ հարազատները սգացել են նրա կորուստը եւ արդեն դուստրը աշխատանքի է գնում:
Սեւանի Ջրափրկարարական ջոկատից էլ NEWS.am-ի թղթակցին հայտնեցին, որ նախարարի հրամանով որոնողական աշխատանքները շարունակվում են մինչեւ արդյունքի կհասնեն: Իսկ թե ինչու այսքան ժամանակ հնարավոր չի եղել գտնել,մեզ փոխանցեցին, որ կասկածելի տարածությունը մեծ է՝ մոտ 15կմ, դրանից բացի այս օրերին եղանակային պայմանները այնքան էլ լավ չէին:
Ավելի վաղ ՏԿԱԻՆ մամուլի ծառայությունը հայտնել էինք, որ ապրիլի 20-ին, ժամը 09.19-ին ահազանգ է ստացվել, որ քամու պատճառով նավակը հեռվացել է Գեղարքունիքի մարզի Ծովազարդ գյուղի մոտակա լճափից. անհրաժեշտ է օգնություն: Դեպքի վայր է մեկնել հատուկ ջրափրկարարական ջոկատից մեկ մարտական հաշվարկ: Ժամը 11.05-ին Դրախտիկ-Ծովագյուղ հատվածում` ափից մոտ 5 կմ հեռավորության վրա, հայտնաբերվել է Ա. Մ.-ի ռետինե, մեկ տեղանոց նավակը. քաղաքացին չի հայտնաբերվել: Ձկնորսի հավանական խեղդվելու վայրում ջրասուզակներն իրականացնում են որոնողական աշխատանքներ: Ժամը 14.10-ին քամու պատճառով աշխատանքները դադարեցվել են անարդյունք: Սեւանա լճում Ա. Մ.-ի որոնողական աշխատանքները վերսկսելու նպատակով ապրիլի 21-ի ժամը 09.40-ի դրությամբ դեպքի վայր է մեկնել հատուկ ջրափրկարարական ջոկատից մեկ մարտական հաշվարկ: