Ռուսաստանում նոյեմբերի 3-ին վթարված հայկական ավտոբուսի վարորդ Գառնիկ Հարությունյանի գործով եւս մեկ փաստաբան է ներգրավվելու:
«Դեսպանությունում առկա տվյալների համաձայն, որոնք ստացվել են Տուլայի շրջանի տարածքային քննչական բաժնից, տվյալ ժամանակահատվածում մեղադրյալի գործով աշխատում է դատարանի կողմից տրամադրված հանրային պաշտպան Անդրեյ Բակշեեւը: Քննչական բաժնի տրամադրած տեղեկատվության համաձայն՝ տվյալ գործընթացին միանալու է նաեւ վճարովի փաստաբան»,- NEWS.am-ի թղթակցին հայտնեցին ՌԴ-ում ՀՀ դեսպանատնից:
Թե ով է լինելու վճարովի փաստաբանը, դեռեւս հայտնի չէ: Գառնիկ Հարությունյանի հարազատները չեն ցանկանում այդ մասին որեւէ տեղեկատվություն հրապարակել:
Հիշեցնենք, որ Տուլայի մարզում ողբերգական վթարը տեղի էր ունեցել 2015թ. նոյեմբերի 3-ին։ Վթարից զոհվել է 9 մարդ։ Վթարի առնչությամբ հարուցվել է քրեական գործ «ճանապարհային երթեւեկության կանոնները եւ փոխադրամիջոցի շահագործման կանոնները խախտելու» հոդվածով։ Վարորդ Գառնիկ Հարությունյանը կալանավորված է։ Նշանակվել են մի շարք փորձաքննություններ, որոնց եզրակացությունները դեռ չեն ստացվել: