Քաղաքացիները ծաղիկներ են բերում Երեւանի Հալաբյանի թիվ 11 շենքի մոտ, որտեղ երեկ՝ ապրիլի 25-ին, երեկոյան պայթել էր թիվ 63 երթուղին սպասարկող ավտոբուսը:
Պայթյունի հետեւանքով 2 մարդ է զոհվել, եւս 7-ը՝ տեղափոխվել հիվանդանոց: Ավտոբուսի վարորդը թեթեւ վնասվածքներ է ստացել եւ դեռեւս ոստիկանությունում է:
Ըստ ՔԿ հաղորդագրության՝ դեպքի վայրի զննությամբ հայտնաբերվել է բջջային հեռախոսային քարտ։ Քննությամբ եւ ԱԱԾ-ի հետ համատեղ իրականացված օպերատիվ-հետախուզական միջոցառումների արդյունքում պարզվել է, որ դեպքի վայրում հայտնաբերված բջջային հեռախոսային քարտի բաժանորդը կենցաղային հողի վրա դժգոհություն է ունեցել ազգականների հետ եւ նախապատրաստվել է պայթեցման եղականով վնասել նրանց:
Տվյալ քարտի բաժանորդի ինքնությունը պարզվել է, նա ՀՀ քաղաքացի է, նախկինում երկու անգամ դատված։ Նրա բնակության վայրում օրենքով սահմանված կարգով ապրիլի 26-ին իրականացված խուզարկությամբ հայտնաբերվել է «տրոտիլ» տեսակի պայթուցիկ նյութ, պայթուցիչ սարքեր (դետոնատոր) և տարբեր տեսակի էլեկտրասարքավորումներ:
«Տրոտիլ» տեսակի պայթուցիկ նյութի տարրեր, հետքեր հայտնաբերվել են նաև ավտոբուսի և դեպքի վայրի զննությամբ առգրավված փորձանմուշների վրա, ինչը հիմնավորվել է նշանակված փորձաքննության նախնական եզրակացությամբ:
Քննությունը շարունակվում է: