Ֆրանսիայի դպրոցներից մեկում ձերբակալվել է 2007-ին այդտեղ սովորող 6-ամյա մի հայ երեխա եւ տեղափոխվել մեկուսարան, գրում է Nouvelles d’Arménie ամսագիրը:
Վերին Լուարա վարչական շրջանի Լանժակ գյուղն ուշքի չի գալիս: Հունվարի 11-ին ժամը 15:30-ին ժանդարմները եկել են դպրոց, որպեսզի ձերբակալեն 6-ամյա Վազգեն Ասրյանին եւ տանեն մեկուսարան, որտեղ գտնվում է նրա ապօրինի ներգաղթյալ հայրը:
«Քաղաքացիական հագուստով մարդիկ վերցրել են երեխային դպրոցի հենց միջանցքից. Տնօրինությունն արդեն տեղեկացված է եղել»,- ասել են դպրոցում, որտեղ երեխան սովորում էր:
Երեխայի հայրը՝ Դավիթ Ասրյանը կալանավորվել էր հունվարի 6-ի գիշերը՝ դիզելային վառելիք գողանալու համար: «Ժանդարմները հայտնաբերել էին, որ նա փաստաթղթեր չունի եւ նախազգուշացրել պրեֆեկտին»,- հայտնել է «Կրթություն առանց սահմանների» (RESF) ցանցի ներկայացուցիչը, հավելելով, որ տղամարդու 20-ամյա ընկերուհին նույնպես կալանավորվել է:
Երեխայի հայրը ապրել է Ռուսաստանում, որտեղից 2007-ին ժամանել է Ֆրանսիա՝ «փախչելով քաղաքական հետապնդումից»: Նրան մերժել են քաղաքական ապաստան տրամադրել, իսկ աշնանը նրան հայտնել են, որ պետք է լքի Ֆրանսիայի տարածքը:
Դատարանը Դավիթ Ասրյանին 15 օրով կալանելու որոշում է կայացրել:
«Ինչպե՞ս բացատրել որդուս ստեղծված իրավիճակը: Երբ որդիս դպրոցիցտուն եկավ, առաջինը, որ նա ասաց, հետեւյալն էր. «Մայրիկ, Ժանդարմները եկել էին իմ ընկեր Վազգենի հետեւից: Մի՞թե դա նորմալ է»,- ասել է Լորան Մարտենը, ում որդին ընկերություն է անում հայ երեխայի հետ: «Ես ցնցված եմ, որ նրանք նեղում են երեխային հանրապետական դպրոցում»,- ֆրանսիացի կինը:
Հարյուրավոր մարդիկ, ասիցիացիաների ու արհմիությունների անդամներ, աշակերտների ծնողներ եւ ընտրյալ դեմքեր հունվարի 11-ին դպրոցի մոտ բողոքի հանրհավաք են անցկացրել: 6-ամյա Անեսան արցունքն աչքերին «Եվրոպա-1»-ին ասել է. «Ես կարոտում եմ նրան, պետք է ազատել Վազգենին եւ նրա հորը»: