«Քաղաքացիական պայմանագրի» հիմնադիր համագումարը կկայանա մայիսի 30-ին, ժամը 11.30-ին, «Էլիտ Պլազա» բիզնես կենտրոնի «Մանթաշով» դահլիճում: Այս մասին NEWS.am-ը տեղեկացավ azdarar.am կայքից:

«Քաղաքացիական» պայմանագրի» նախաձեռնող խմբի անդամներից  Արայիկ Հարությունյանը NEWS.am-ի թղթակցի հետ զրույցում նշեց, որ համագումարի օրակարգը դեռ հստակեցված չէ, բայց հիմնական խնդիրը կուսակցության հարցի քննարկումն է: «Եթե այդ որոշումը կայացվի, կանոնադրությունը եւ ծրագիրը հաստատվեն, դրանից հետո կլինի վարչության կազմի ընտրություններ: Հրավիրյալների հարցը դեռ չի քննարկվել, այլ կարեւոր կազմակերպչական խնդիրներ կան»,-ասաց Արայիկ Հարությունյանը:

Իսկ թե ինչ ակնկալիքներ ունեն, կկարողանան մարդկանց մեջ հույս արթնացնել, հաղթահարել գաղջ մթնոլորտը, «Քաղաքացիական պայմանագրի» անդամը նշեց, որ եթե նման ակնկալիքներ չունենային, այս գործը չէին նախաձեռնի: Նրանք նախատեսում են մի քանի գործիքներ կիրառել կուսակցության հիմադրումից հետ՝ սուպերլիդերության վերացում, բանավեճեր, քննարկումներ, որը թույլ կտա կենսունակ կուսակցություն ստեղծել, որի նմանը չկա:

Նշենք, որ կառավարման խորհրդի կազմում 2013 թվականի դեկտեմբերի 9-ին ընտրվել էին 7 անձինք, այդ թվում՝ ազատամարտիկ, նախկին պատգամավոր Սասուն Միքայելյանը եւ պատգամավոր Նիկոլ Փաշինյանը։