ԼՂՀ Պաշտպանության բանակը ներկայացրել է Լեռնային Ղարաբաղի դեմ Ադրբեջանի սանձազերծած լայնածավալ ագրեսիայի ընթացքում զոհերի եւ վիրավորների մասին վերջին տվյալները:
NEWS.am-ի հատուկ թղթակցի փոխանցմամբ, Ստեփանակերտում օպերատիվ կենտրոնում կայացած ասուլիսում ԼՂՀ Պաշտպանության բանակի օպերատիվ բաժնի պետ, գնդապետ Վիկտոր Առստամյանը հայտնել է, թե հակամարտության սրման հետեւանքով զոհվել է 29 զինծառայող, 28 անհետ կորած, 101 վիրավոր:
Գնդապետի խոսքով, ադրբեջանական կողմի կորուստները ավելին են՝ 2 հազարից ավելի զոհեր եւ վիրավորներ: Որպես ապացույց ՊԲ ներկայացուցիչը ներկայացրել է հետախուզության որսած հեռախոսազրույցը, որն ապացուցում է այդ տվյալների իսկությունը:
Պատասխանելով ադրբեջանական կողմից «Սմերչ» համակարգի կիրառելու մասին հարցին, ՊԲ ներկայացուցիչը նշել է, թե հակառակորդը սխալվել է իր հաշվարկներում, ենթադրյալ թիրախը չեն խոցել, ինչի արդյունքում ղարաբաղյան կողմը կորուստ չի ունեցել:
