Հայաստանի մարդու իրավունքների պաշտպան Արման Թաթոյանը ՄԻԺԻ հիմնադիր Արմինե Առաքելյանի հարցով դիմել է գլխավոր դատախազին:
Այս առնչությամբ ՄԻՊ-ի տարածած հաղորդագրությունում, մասնավորապես ասվում է.
«Զանգվածային լրատվության միջոցներով տեղեկություններ են տարածվել այն մասին, որ «Մարդու իրավունքների եւ ժողովրդավարության ինստիտուտ» (ՄԻԺԻ) հասարակական կազմակերպության ղեկավար Արմինե Առաքելյանը «Նուբարաշեն» հոգեբուժական կենտրոնում ենթարկվել է խոշտանգման եւ վատ վերաբերմունքի այլ ձեւերի: Այս մասին հրապարակային աղբյուրներով տեղեկություններ է ներկայացրել նաեւ Արմինե Առաքելյանը:
Այդ հրապարակումների մանրամասն ուսումնասիրության հիման վրա ՀՀ Մարդու իրավունքների պաշտպանի կողմից նախաձեռնվել է սեփական նախաձեռնությամբ հարցի քննարկման ընթացակարգ:
Քննարկման ընթացակարգի շրջանակներում Պաշտպանը դիմել է ՀՀ գլխավոր դատախազին՝ խնդրելով սեղմ ժամկետում քննարկել ՀՀ քրեական դատավարության օրենսգրքով սահմանված կարգով վարույթ նախաձեռնելու հարցը:
Նշվածի կապակցությամբ պարզաբանումներ ստանալու նպատակով համապատասխան գրություն է ուղարկվել նաեւ Առողջապահության նախարարին»:
Նշենք, որ քաղաքագետ, ՄԻԺԻ հասարակական կազմակերպության հիմնադիր Արմինե Առաքելյանին մայիսի 17-ին Հանրապետության հրապարակի շատրվանների ավազանից ոստիկանները բռնությամբ տեղափոխել էին հոգեբանական կենտրոն: Ավելի ուշ նա «Ժամանակ» թերթին տված հարցազրույցում նշել էր, որ այդ կենտրոնում իրեն գետնով քարշ են տվել: «Տարան, շատ ամուր կապեցին անկողնուն, այնքան ուժեղ, որ արյունս կանգնել էր։ Կապեցին ու սկսեցին խփել, ծեծել, այնպես, որ մարմնիս տարբեր մասերում հարվածներ ստացա»,-պատմել էր Արմինե Առաքելյանը՝ հավելելով, որ այդ հոգեբանական կենտրոնում իրեն չեն գրանցել, որեըէ փաստաթուղթ չեն պահանջել, թեեւ իր պայուսակն իր հետ էր:
