Աշխարհում ավելի քան 1 մլրդ դպրոցականների մեկ քառորդը տառապում է բռնությունից եւ հասակակիցների ծաղրից։ Նման տվյալներ են ներկայացրել Սեուլում կայացած միջազգային սիմպոզիումի շրջանակում, որը ՅՈՒՆԵՍԿՕ–ի հետ համատեղ կազմակերպել էր Հարավային Կորեայի դպրոցական բռնության կանխարգելման ինստիտուտը, հայտնում է ՄԱԿ–ի ռադիոն։

ՅՈՒՆԵՍԿՕ–ի նոր զեկույցը վերլուծել է միջին եւ ցածր եկամուտ ունեցող 19 երկրներից ստացած տվյալները։ 11-13 տարեկան դպրոցականների 34 տոկոսը հայտնել է, որ մեկ ամսվա ընթացքում առնվազն մեկ անգամ ծաղրի է ենթարկվել, ընդ որում, 8 տոկոսը խոստովանել է, որ դա տեղի է ունեցել ամեն օր։

ՅՈՒՆԵՍԿՕ–ի ներկայացուցիչ Քրիստոֆեր Քասլի խոսքով՝ դպրոցներում բռնությունը սնող գլխավոր գործոններից մեկը աղքատությունն է ու երեխաների սոցիալական կարգավիճակը։