ՀՀ նախագահի թեկնածուի օգտին քվեարկելու մեկ տարբերակ կա, եթե ՀՀԿ–ն առաջադրի «Ելք» դաշինքի պատգամավոր Արտակ Զեյնալյանի թեկնածությունը։ Այս մասին NEWS.am-ի հետ զրույցում նշեց «Ելք» խմբակցության պատգամավոր Արամ Սարգսյանը:
«Այն չափանիշները, որ ներկայացրել է Սերժ Սարգսյանը, ամբողջությամբ համընկնում է Արտակ Զեյնալյանի կենսագրության հետ, եկեք նայենք էդ մարդու կենսագրությունը, փորձը, արած աշխատանքը եւ տարիքը նաեւ, նա իսկապես արժանի է»,–ասաց Արամ Սարգսյանը։
«Այս իշխանությունը իր ստեղծած օրենքներով նույնիսկ հնարավորություն չի ընձեռում, որ «Ելք»–ը կարողանա իր թեկնածուին առաջադրել ու Ա ամբիոնն օգտագործել իր նախագահի թեկնածուի ծրագրեր, գաղափարները քարոզել, համեմատել ու ասել՝ այ, դուք ձեր թեկնածուն ունեք, մենք էլ մեր, եկեք համեմատենք։ Ընտրության իմիտացիա նույնիսկ թույլ չեն տալիս՝ իմանալով, որ այդքան քվե չունենք։ Հետեւաբար ինչ հույս ունեն, որ մենք իրենց թեկնածուին կողմ քվեարկենք, դա անհնարին բան է»,–ասաց պատգամավորը։
Նշենք, որ առայժմ շրջանառվող անուններից ամենահավանական թեկնածուն համարվում է Մեծ Բրիտանիայում Հայաստանի դեսպան Արմեն Սարգսյանի թեկնածությունը։
Հիշեցնենք, որ Սերժ Սարգսյանը անցած շաբաթ նախագահականում հրավիրված խորհրդակցության ժամանակ ցանկություն էր հայտնել, որ ՀՀԿ–ի նախագահի թեկնածուն ընտրվի լայն համաձայնությամբ։ Ավելի ուշ մի խումբ մտավորականների հետ հանդիպման ժամանակ թվարկել էր այն հատկանիշները, որոնք պետք է ունենա Հայաստանի 4–րդ նախագահը։ Ըստ նրա՝ թեկնածուն պետք է ունենա անցած ճանապարհ, ճանաչում ե՛ւ երկրի ներսում, ե՛ւ դրսում, կարող է պատշաճ մակարդակով, ըստ արժանվույն ներկայացնել Հայաստանն արտերկրում, պետք է տիրապետի օտար լեզուների, ունենա լայն կապեր թե՛ սփյուռքում, թե՛ Հայաստանում, վայելի հեղինակություն, անկողմնակալ մարդ լինի, որը երբեք քաղաքականությամբ չի զբաղվել եւ կուսակցության անդամ չի եղել։