ԵՄ-ի եւ Հայաստանի միջեւ ստորագրված համաձայնագիրը ցույց է տվել, որ ռուսական կողմից ներկայացվող պատմությունը, թե Արեւելյան գործընկերությունն ուղղված է Ռուսաստանի դեմ, ամբողջությամբ հակասում է փաստերին: Այս մասին հայտարարել է ԵՄ հարեւանության քաղաքականության եւ ընդլայնման հարցերով եվրահանձնաժողովի Գլխավոր տնօրինության ղեկավարի տեղակալ Կատարինա Մատերնովան:
NEWS.am-ի հատուկ թղթակիցը Բրյուսելից հաղորդում է, որ Մատերնովան նշել է, որ ԵՄ-ն մշտապես ասել է, որ երկրներն ընտրություն կատարելու կարիք չունեն: «Դուք (Հայաստանը) չեք կարող ԵՄ-ի հետ ազատ առեւտրի գոտու մի մասը լինել, սակայն նոր համաձայնագրով մենք ցույց տվեցինք, որ Եվրասիական միության անդամ լինելով՝ դուք դեռեւս կարող եք առեւտրային հարաբերություններ ունենալ, որոնք կարգավորվում են այդ համաձայնագրով»,- նշել է նա՝ պատասխանելով NEWS.am-ի հարցին:
Խոսելով Արեւելյան գործընկերության նոր ճարտարապետության մասին, որը մարտի 12-ին գործարկվել է Բրյուսելում, Մատերնովան նշեց, որ նոր ճարտարապետությունը վերաբերում է երկրներին սատարելուն, իսկ Հայաստանի հետ համաձայնագիրը երկկողմանի է եւ ավելի շատ վերաբերում է փոխադարձ առեւտրին՝ քաղաքական որոշակի ասպեկտներով:
