ՀՅԴ խմբակցության պատգամավոր Ռուզան Առաքելյանին այսօր չի հաջողվել մուտք գործել ԱԺ շենք և մասնակցեք արտահերթ նիստին։
NEWS.am–ի հետ զրույցում պատգամավորը հայտնեց, որ երբ հասել է Դեմիրճյան փողոցի մուտքի մոտ՝ դարպասներն արդեն փակ են եղել։
Ըստ պատգամավորի՝ դարպասների մոտ հավաքված մարդկանցից մի կին ճանաչել է իրեն և սկսել վիրավորել։
«Շատ հիստերիկ ձևով մոտեցավ, փորձելով վիրավորել ինձ, բարձրաձայն բղավում էր, որ ես դաշնակցական պատգամավոր եմ, որ մյուսների ուշադրությունն իմ վրա սեւեռեր, ես իհարկե հանգստացի այդ կնջը և դուրս եկա»,– նշեց նա՝ հավելելով, որ մեծ դժվարությամբ է կարողացել դուրս գալ Դեմիրճյան փողոցից։
Պատգամավորը հայտարարեց, որ թեեւ ինքը չի մասնակցել նիստին
և քվեարկելու հնարավորություն չի ունեցել, սակայն միանում է նախագծին կողմ քվեարկած պատգամավորներին։
Պատգամավորը նաև հայտարարեց, որ ՀՅԴ –ն ավելի վաղ է հետ կանչել կառավարության իր անդամներին, քան Նիկոլ Փաշինյանը կազատեր նրանց։
Ավելի վաղ NEWS.am-ը հայտնել էր, որ ՀՀԿ-ական Արփինե Հովհաննիսյանը եւ «Ծառուկյան» խմբակցության պատգամավոր Գեւորգ Պետրոսյանը «ԱԺ կանոնակարգ-օրենքի» 50-րդ հոդվածում փոփոխություն են առաջարկել, որը, ըստ «Ելք»-ի պատգամավորների` թույլ կտա նրանց խափանել արտահերթ ընտրությունների անցկացումը՝ վարչապետի հրաժարականից հետո:
Խոսքն այն մասին է, որ վարչապետի հրաժարականից հետո ժողովուրդը կարող էր շրջափակել ԱԺ շենքը, որ նիստ չգումարվի եւ նոր վարչապետ չընտրվի, որպեսզի ԱԺ-ն ցրվի, իսկ այդ օրինագիծը նախատեսում է, որ նման դեպքում ԱԺ նիստը համարվում է ընդհատված եւ ԱԺ լուծարումը տեղի չի ունենում:
Նշենք, որ ԱԺ-ն այսօր ավելի ուշ արտահերթ նիստում 67 կողմ ձայներով ընդունեց այդ օրինագիծը: ՀՀ վարչապետ Նիկոլ Փաշինյանի կոչով քաղաքացիները հավաքվել են ԱԺ շենքի մոտ եւ շրջափակել շենքը: