Ուգանդայում անհայտ անձինք առեւանգել են մի ամերիկուհու։ Նրա համար կես միլիոն դոլար փրկագին են պահանջում։
Ինչպես հայտնում է AP-ը, 35-ամյա Քիմբերլի Սյու Էնդեկոտը եւ ուգանդացի վարորդ Ջին Փոլը առեւանգվել են Ելիզավետ թագուհու վայրի բնության ազգային այգում։ Չորս զինված տղամարդիկ ավտոմեքենայով դարանակալել են նրանց։
Տարատեսակ անօրինական խմբեր՝ սոմալեցի իսլամիստներից մինչեւ կոնգոցի զինյալներ երբեմն գործում են Ուգանդայում, սակայն առեւանգողների անձը դեռեւս հայտնի չէ։
Հանրահայտ այգին տեղակայված է մայրաքաղաք Կամպալայից 400 կմ հեռավորությամբ, Կոնգոյի Դեմոկրատական Հանրապետությունից ոչ հեռու։
Ոստիկանությունը հայտնել է, որ առեւանգումը կատարվել է ֆինանսական դրդապատճառներով։
