Վրաստանի մայրաքաղաքում Ռուսթավելիի պողոտայում այսօր 2 ցույց է ընթանում, հաղորդում է «Նովոստի Գրուզիա»-ն:
Խորհրդարանի դիմաց վաղ առավոտից սկսել են հավաքվել ԼԳԲՏ համայնքի հակառակորդները՝ հոգեւորականներ, «Վրաստանի հայրենասերների դաշինք» կուսակցության անդամները, «Վրացական երթ» կազմակերպության ներկայացուցիչներն ու այլ խմբավորումներ, որոնք իրենց «ավանդական արժեքների» պաշտպան են անվանում:
Նրանք հայտարարել են, որ չեն ցրվի, քանի դեռ Վրաստանի իշխանությունները չեն չեղարկել հակադիսկրիմինացիոն օրենքը:
ԼԳԲՏ համայնքի հակառակորդները զբաղեցրել են հրապարակը, որտեղ արդեն գրեթե 20 օր հավաքվում են քաղաքացիական ակտիվիստներն ու քաղաքական գործիչները, որոնք դեմ են «ռուսական ագրեսիային» եւ պահանջում են ՆԳՆ ղեկավարի հրաժարականը:
Ոստիկանները փակել են Ռուսթավելի տանող ճանապարհը:
Ավելի վաղ ցույցի մասնակիցներից մեկը գլխի վնասվածքով հիվանդանոց էր տեղափոխվել: Բժիշկների խոսքով՝ այժմ նրա վիճակը կայուն է: