Արեւելյան Միջերկրական ծովում ածխաջրածինների պաշարների պատճառով Աթենքի եւ Նիկոսիայի հետ Անկարայի հակամարտության էսկալացիան կդառնա Եվրոպական խորհրդի նիստի գլխավոր թեման, որի ժամանակ ԵՄ-ն կքննարկի Թուրքիայի դեմ պատժամիջոցների վերաբերյալ հարցը։

Ֆրանսիայի ԱԳ նախարար Ժան-Իվ Լե Դրիանը եւ ԵՄ մյուս երկրների նրա գործընկերներն արդեն քննարկել են «միջոցառումների տիրույթը, որը կկարողանային նախաձեռնել Թուրքիայի նկատմամբ»,- AFP-ի փոխանցմամբ ասել է Լե Դրիանը։

ԵՄ առաջնորդները միաժամանակ պատրաստվում են հանդիպել սեպտեմբերի 24-ին երկօրյա գագաթնաժողովում, որի ժամանակ լուծելու են Անկարայի դեմ տարածաշրջանում իր գործունության պատճառով պատժամիջոցներ կիրառելու հարցը։

Լե Դրիանը Թուրքիայի նախագահին կոչ է արել իր տարածաշրջանային խնդիրների շուրջ բանակցություններ սկսել մինչեւ Եվրոպական խորհրդի առաջիկա նիստը։ «Թուրքերը պետք է ցույց տան, որ այս հարցը կարող է քննարկվել,- France Inter ռադիոյին ասել է Ֆրանսիայի ԱԳ նախարարը։ - Եթե դա այդպես է, ապա մենք կարող ենք բարենպաստ մթնոլորտ ստեղծել բոլոր խնդիրների լուծման համար»։