Նիկոլ Փաշինյանն անընդհատ ստում է, ստելը նրա կրեդոն է: Այս մասին Վլադիմիր Սոլովյովին տված հարցազրույցում ասել է ՀՀ ԱԱԾ նախկին տնօրեն, «Ես պատիվ ունեմ» դաշինքի ղեկավար Արթուր Վանեցյանը՝ մեկնաբանելով իր նշանակումը ԱԱԾ-ի տնօրենի պաշտոնում եւ այնուհետեւ Փաշինյանի իշխանությունների կողմից իրեն առաջադրված մեղադրանքը:
«Նա ստելուց բացի այլ բան չգիտի: Նրա ստի պատճառով մենք միշտ վատ հետեւանքներ ենք ունենում երկրի համար»,- հավելել է Վանեցյանը: Նա հաստատել է, որ Ազգային անվտանգության ծառայության տնօրեն է նշանակվել 2018-ի այսպես կոչված հեղափոխությունից հետո: «Այդ ժամանակ ամբողջ ժողովուրդը, ես չեմ վախենում նման գնահատական տալ, ժողովրդի մեծամասնությունը սատարում էր Նիկոլ Փաշինյանին: Նա իշխանության եկավ փողոցի միջոցով, հեղափոխական գործընթացների միջոցով: Փաշինյանի վարքագծում պոպուլիզմի շատ մեծ բաժին կար: Այն ժամանակ ես կարծում էի, որ հնարավոր է իրավիճակը ճիշտ ուղով տանել, օգտվել ժողովրդի հավատից եւ հույսից, որպեսզի Հայաստանը զարգանա»,- իշխանությունների հետ համագործակցությունը բացատրեց Վանեցյանը:
«Նա ինձ չի հեռացրել աշխատանքից: 20 տարեկանից ծառայել եմ անվտանգության գործակալություններում եւ բարձրացել եմ մինչեւ Ազգային անվտանգության ծառայության տնօրենի պաշտոն: Ես փողոցից մարդ չեմ, կադրային չեկիստ: Բայց ես ընդունեցի առաջարկը եւ հասկացա, որ ես կարեւոր դեր ունեմ գործընթացում եւ չպետք է մերժեմ, այլ ստանձնեմ պատասխանատվություն եւ առաջ գնամ: ԱԱԾ-ի աշխատանքի այս ժամանակահատվածը, բոլորը ընդունում են դա, եւ Փաշինյանը նույնպես ընդունում է, որ ամենաարդյունավետն էր: Իշխանության գալով` նա խոսում էր կոռուպցիայի դեմ պայքարի մասին: Ես այն մարդն էի, ով դա կյանքի կոչեց: Հեռացել եմ, քանի որ հասկանում էի, որ պոպուլիզմը վերաճել է մեկ այլ բանի` նիկոլիզմի:
Իսկ նիկոլիզմը շատ սարսափելի բան է: Նա Հայաստանին եւ Արցախին բերեց այն հետեւանքներին, որոնք կան: Մարդը, ով ունակ է մտածելու ու 2-3 քայլ առաջ հաշվելու, հասկանում է, որ Նիկոլի հետ լինել չի կարելի: Հեռանալիս ես հայտարարություն արեցի, որ նա երկիրը դեպի անդունդ է տանում: Նրանք ինձ չլսեցին, սկսեցին մեղադրել ինձ ռուսական լրտես լինելու մեջ, որ ես կապված եմ «նախկինների» հետ: Արդյունքում ես չէի կարող մարդկանց բացատրել, թե մեզ ինչ է սպասում: Ցավոք, իմ բոլոր կանխատեսումները շատ վատ ձեւով իրականություն դարձան»,- ասաց Արթուր Վանեցյանը:
ԱԱԾ-ի նախկին տնօրենն ասել է, որ պատերազմի սկսվելու օրը` սեպտեմբերի 27-ին, նա գտնվում էր Մոսկվայում: «Պատերազմի մասին լուրեր ստանալուց հետո ես անմիջապես վերադարձա, իսկ հաջորդ օրը մենք գնացինք Ղարաբաղ: Անմիջական մասնակցություն եմ ունեցել ռազմական գործողություններին: Ավտոմատը ձեռքին գեներալի խրամատում հաճախ չես տեսնի»,- հավելել է Վանեցյանը: Ռազմական գործողությունների ավարտի պահին Վանեցյանի ջոկատը գտնվում էր Շուշիի մերձակա Շոշ գյուղում, ուր ուղարկվել էր բանակի հրամանատարության կողմից: Դիրքերը լքելու հրաման ստանալուց հետո վերադարձել է Երեւան, հարցը լուծելու քաղաքական ճանապարհով, նշել է Վանեցյանը:
