նախընտրելի դարձնել
ԱՄՆ-ն կարող է վերանայել Ֆոլքլենդյան կղզիների նկատմամբ Մեծ Բրիտանիայի ինքնիշխանության վերաբերյալ իր դիրքորոշումը, եթե բրիտանական կառավարությունը չավելացնի պաշտպանական ծախսերը, հայտնում է The Telegraph-ը՝ հղում անելով ամերիկացի պաշտոնյայի։
Պարբերականի տվյալներով, Պենտագոնում քննարկում են Ֆոլքլենդների հարցը որպես Լոնդոնի վրա ճնշման գործիքներից մեկն օգտագործելու հնարավորությունը, որպեսզի դրդեն նրան կատարել ՆԱՏՕ-ի պարտավորությունը՝ պաշտպանական ծախսերը հասցնելով ՀՆԱ-ի 5%-ին։
ԱՄՆ վարչակազմի բարձրաստիճան ներկայացուցիչը The Telegraph-ին հայտնել է, որ Մեծ Բրիտանիան, հավանաբար, կստանա «հատուկ ուշադրություն» այն գնահատման շրջանակում, որն ԱՄՆ-ն իրականացնում է՝ հասկանալու համար, թե որքանով են դաշնակիցները հավատարիմ ՆԱՏՕ-ի նոր պարտավորությունների կատարմանը։ Վաշինգտոնում մտադիր են պարզել, թե արդյոք դաշինքի երկրները ունեն թիրախային ցուցանիշին հասնելու իրատեսական ծրագրեր։
Պաշտոնյան նշել է, որ Մեծ Բրիտանիան ունի ներուժ դառնալու ԱՄՆ-ի առանցքային պաշտպանական գործընկերներից մեկը, սակայն հունիսին հայտարարված ռազմական ծախսերի ավելացման ծրագիրը բավարար չէ։
«Ես ակնկալում եմ, որ Մեծ Բրիտանիան կստանա հատուկ ուշադրություն, քանի որ այն ունի այդքան մեծ ներուժ։ Այդ պատճառով մենք կշարունակենք ջանքերը՝ խթանելու և օգնելու Լոնդոնին զգալիորեն մեծացնել ծախսերը», — հայտարարել է նա։
Հարցին, թե հնարավո՞ր է ԱՄՆ դիրքորոշման փոփոխություն Ֆոլքլենդյան կղզիների հարցում, պաշտոնյան պատասխանել է, որ բրիտանական կողմի հետ բանակցություններն ընթանում են անկեղծ մթնոլորտում, և Վաշինգտոնը «ոչ մի տարբերակ չի բացառում», որոնք կարող են դրդել դաշնակիցներին իրենց վրա վերցնել պաշտպանական ծախսերի ավելի մեծ բաժինը։
The Telegraph-ի հրապարակումը հայտնվել է Մեծ Բրիտանիայի պաշտպանության նախարար Ջոն Հիլիի առաջին բյուջեի նախապատրաստման ֆոնին՝ Էնդի Բերնհեմի նոր կառավարությունում։ Ինչպես պնդում է պարբերականը, բյուջեն չի նախատեսում պաշտպանական ծախսերը մինչև 2030 թվականը հասցնել ՀՆԱ-ի 3%-ին։
Ֆոլքլենդյան կղզիները գտնվում են բրիտանական կառավարման ներքո, սակայն Արգենտինան շարունակում է հայտարարել արշիպելագի նկատմամբ իր իրավունքների մասին։ 1982 թվականին այդ կղզիների պատճառով Մեծ Բրիտանիայի և Արգենտինայի միջև զինված հակամարտություն է տեղի ունեցել։
