նախընտրելի դարձնել«Հայ խոհարարական ավանդույթների զարգացման եւ պահպանման» հասարակական կազմակերպությունը, ««Արենի» Փառատոն» հիմնադրամը, Ախթալայի քաղաքապետարանը եւ Լոռու մարզի մարզպետարանը, ՀՀ Էկոնոմիկայի նախարարության աջակցությամբ, սեպտեմբերի 8-ին Լոռու մարզի Ախթալա քաղաքում կազմակերպում են արդեն ավանդական դարձած Խորովածի չորրորդ միջազգային փառատոն-մրցույթը:
Փառատոնի կազմակերպման նպատակն է` ապահովել հայկական խոհանոցի ավանդական ուտեստների, մասնավորապես, խորովածի մասսայականացումը եւ տարածումը` հրապարակավ ներկայացնելով այն որպես հայկական խոհանոցի եւ խոհանոցային մշակույթի անբաժանելի մաս:Փառատոնը միտված է նաեւ զարգացնելու զբոսաշրջությունը համայնքներում՝ այս պարագայում Ախթալայում, ինչպես նաեւ, առավելապես ներգրավելով տեղի բնակչությանը՝ ապահովել վերջիններիս զբաղվածությունը:
Փառատոնն առաջին անգամ կազմակերպվել է 2009թ.-ին, անցած երեք տարիների ընթացքում ձեռք է բերել մեծ մասսայականություն եւ հետաքրքրություն է առաջացրել ոչ միայն Հայաստանում, այլ նաեւ արտերկրում. Վրաստանում, Ռուսաստանում, Եվրոպայում:
Խորովածի առաջին փառատոնին` 2009թ.-ին, մասնակցել են ութ ռեստորաններ Հայաստանից եւ 2000 այցելու, անցած տարի 2011թ-ին` Խորովածի երրորդ փառատոնին, մասնակցել 25 ռեստորաններ` Հայաստանից եւ Վրաստանից, եւ մոտ 15 000 այցելու աշխարհի տարբեր երկրներից:
Փառատոնի ընթացքում նախատեսվում են մի շարք հետաքրքիր միջոցառումներ:
Փառատոնի ծրագիրն ընդգրկում է՝
• բացման հանդիսավոր արարողություն
• խորովածի պատրաստման հետ կապված ողջ գործընթացի ցուցադրում խորովածի տարբեր տեսակների ցուցադրություն-համտես
• պրոֆեսիոնալ խորոված պատրաստողների մրցույթ
• խաղային մրցույթներ
• ազգային երաժշտություն (‹‹Սասնա ծռեր›› ազգագրական համույթ, ‹‹Հորովել›› երգի եւ պարի պետական համույթ, ‹‹Լազուր›› ժողգործիքների համույթ, ‹‹Փողային նվագախումբ››, Լեյլա Սարիբեկյան, Արսեն Գրիգորյան, Մկրտիչ Մկրտչյան, Դավիթ Ամալյան եւ այլն):
• նկարների ցուցահանդես` հայ նկարիչների մասնակցությամբ
Փառատոնը կեզրափակվի համերգային ծրագրով, որին կմասնակի The Beautified Project խումբը:
Միջոցառմանը հրավիրված են նաեւ ՀՀ կառավարության անդամներ, Ազգային ժողովի պատգամավորներ, միջազգային եւ հասարակական կազմակերպությունների, զբոսաշրջության ոլորտի ներկայացուցիչներ:
Ավտոբուսների տոմսի արժեքն է՝ 5000 դրամ(երկկողմանի):
