Այս տարի «Թատերական Լոռի» 21-րդ,  միջազգային  կարգավիճակով՝ 3-րդ փառատոնը, նվիրվում  է անվանի դերասանուհի,  Հայաստանի ժողովրդական արտիստուհի   Գալյա Նովենցի հիշատակին:

«Թատերական Լոռին» հիմնադրվել է  1979 թ.՝  նպատակ ունենալով տարեկան մեկ անգամ իրականացնել ոչ պրոֆեսիոնալ թատրոնների ստուգատես: 1980-ականներից այն դարձել էր ժողովրդական թատրոնների փառատոն՝  համախմբելով   Հայաստանի եւ ԽՍՀՄ  հանրապետությունների մարզերի ու շրջանների պրոֆեսիոնալ եւ ոչ պրոֆեսիոնալ թատերական գործիչներին:

2006 թ-ից  փառատոնին մասնակցում են նաեւ Հայաստանի եւ արտերկրի պրոֆեսիոնալ թատրոններ: «Թատերական Լոռի» փառատոնը  նպատակ ունի Լոռու մարզի բնակչությանը հաղորդակից դարձնել թատերարվեստի զարգացումներին, թատրոնի միջոցով մշակութային կապեր հաստատել Հայաստանի տարբեր շրջանների եւ աշխարհի երկրների միջեւ:

«Թատերական Լոռի» փառատոնին մասնակցելու է Հայաստանը, Վրաստանը, Արցախն ու Բելառուսի ներկայացնող 22 թատերախումբ, եւ14 մրցութային անվանակարգերում կխաղացվի 28 ներկայացում : Փառատոնի մրցութային հիմնական ծրագիրը կանցկացվի Ալավերդի քաղաքում, սակայն մասնակից թատերախմբերը ներկայացումներով հանդես կգան նաեւ Վանաձորում եւ  Սպիտակում: Հաղթողների անունները կհրապարակվեն հոկտեմբերի 7-ին՝ Ալավերդու մշակույթի կենտրոնում կայանալիք մրցանակաբաշխության եւ փառատոնի փակման  հանդիսավոր արարողության ժամանակ։

Կնշվի Ստեփանակերտի Վահրամ Փափազյանի անվան պետական դրամատիկական թատրոնի  հիմնադրման 80-ամյակը, Ալավերդու կենտրոնական գրադարանում կգործի  հայ գրատպության 500-ամյակին նվիրված ցուցահանդես:

ՀՀ մշակույթի նախարարության  հովանու ներքո անցկացվող «Թատերական Լոռի» փառատոնի գեղարվեստական ղեկավարը ՀՀ ժողովրդական արտիստ Վահե Շահվերդյանն է: