Վերջին տասը տարիների ընթացքում մեր երկրում հանցագործությունների թիվը կրճատվել է 25%-ով, 50%-ով կրճատվել է նաեւ մանկական հացագործությունները թիվը: Այդ մասին դեկտեմբերի 22-ի մամուլի ասուլիսում նշել է  «Սոցիոմետր» սոցիոլոգիական  կենտրոնի տնօրեն Ահարոն Ադիբեկյանը: 

«Ըստ նախորդ տարվա տվյալների` Հայաստանում գրանցված 4000 հանցագործություններից 170-ը  մանկական էր: ԱՊՀ մյուս երկրների համեմատ` մանկական հացագործությունների ցուցանիշը մեզ մոտ բավական ցածր է:  Դրամի կարիք ունեցող անչափահասները գողության են դիմում կամ այլ տեսակի հանցագործության: Մեզ մոտ, բարեբախտաբար, ալկոհոլիզմի եւ թմրանյութերից կախվածության մակարդակն անչափահասների շրջանում այնքան էլ բարձր չէ: Այդ պատճառով էլ Հայաստանում հանցագործությունների արտաքին սոցիալական պատճառները բավական  թույլ են», - նշել է սոցիոլոգը:

Ըստ նրա` մեծահասակները պետք է ուշադիր հետեւեն, թե ում հետ է շփվում իրենց երեխան, ինչպես է ծախսում փողը, սովորեցնեն նրան պատասխան տալ սեփական քայլերի համար եւ երեխայի ազատ ժամանակը լրացնել օգտակար զբաղմունքներով: «Ընտանիքն այն բարենպաստ  հիմքն է, որն անհրաժեշտ է  յուրաքանչյուր երեխայի նորմալ  կայունացման համար: Այդ տեսանկյունից սոցիալական միջավայրը շատ կարեւոր դեր է խաղում», - ամփոփել է Ահարոն Ադիբեկյանը: